Փաստ ինֆո

«Շենգավիթ» ԲԿ-ի մանկաբարձ-գինեկոլոգներ Շուշանիկ Բախշյանի և Անի Բաբելյանի վերաբերյալ հարուցված քրեական գործն ապօրինի է, իսկ մեղադրանքները՝ անհիմն, ուստիև՝ պաշտպանները միջնորդում են արդարացնել իրենց պաշտպանյալներին:

Այդ մասին այսօր Երևան քաղաքի ընդհանուր իրավասության դատարանում գործով պաշտպանական ճառով հանդես գալիս հայտարարեցին ամբաստանյալների պաշտպանները:

Ըստ Շուշանիկ Բախշյանի պաշտպան Ալեքսանդր Սիրունյանի՝ քրեական գործը հարուցվել է առանց հիմքերի, աչքաչափով մեղադրանք է ներկայացվել:

Բախշյանի մեղադրանքում նշվող՝ Մերի Մարգարյանը 4 օր շարունակ ունեցել է բարձր ջերմություն, սակայն Շուշանիկ Բախշյանը, ով եղել է հղիի բժշկական օգնություն և սպասարկում իրականացնող բժշկուհին, պարտավոր լինելով նրան հոսպիտալացնել, հրաժարվել և չի կատարել իր պարտականությունները՝ այս պայմաններում հղիին չհոսպիտալացնելը չի հիմնավորվել՝ այս դրվագի վերաբերյալ պաշտպանը կարծիք հայտնեց, թե մեղադրանքը ծաղկացրել՝ «ծյունինգ» են արել:

Պաշտպանը գտում է, որ թեև գործում ապացույցները շատ են, սակայն գործին վերաբերելի է միայն դատաբժշկական փորձաքննության եզրակացությունը:

Սիրունյանի համոզմամբ՝ նույնիսկ դատախազությունը համոզված չէ, թե ով է մեղավոր Մերի Մարգարյանի և նորածնի մահվան մեջ, և որ իր պաշտպանյալն անմեղ է:

Գործով մյուս ամբաստանյալ Անի Բաբելյանի պաշտպան Գեղամ Հակոբյանն իր պաշտպանական ճառը սկսեց տուժող կողմին ուղղված ցավակցական խոսքով:

Պաշտպան Հակոբյանը ևս գտնում է, որ բժիշկ Բաբելյանին առաջադրված մեղադրանքն անհիմն է, շինծու: Նախաքննությունը կատարվել է բացահայտ կողմնակալությամբ և մեղադրանքը առաջադրելիս հիմնվել են սեփական ենթադրություններով:

Անի Բաբելյանի մյուս պաշտպան Կարեն Սարդարյանը էլ նշեց՝ դատավարությունը չպետք է վրեժխնդրության վերածվի և անմեղների մեջ մեղավոր չպետք է փնտրել:

Շուշանիկ Բախշյանի պաշտպաններ Ալեքսանդր Սիրունյանը և Կարեն Կարապետյանը, ինչպես նաև Անի Բաբելյանի պաշտպաններ Գեղամ Հակոբյանը և Կարեն Սարդարյանը միջնորդեցին արդարացնել իր պաշտպանյալաներին:

Դատական նիստն ընդմիջվեց՝ հաջորդիվ ճառով հանդես կգան ամբաստանյալները:

Աղբյուր` Փաստինֆո