Փաստ ինֆո

Երրորդմասցի Լյովիկի ու նրա ընկերների սպանության աղմկահարույց գործով այսօրվա դատական նիստում ապացույցի ու իրեղեն ապացույցների անթույլատրելիությունը հաստատելու մասին պաշտպանական կողմի ևս մեկ միջնորդության լուծումը հետաձգվեց: 

Դատարանը դրան կանդրադառնա խորհրդակցական սենյակում վերջնական դատական ակտ կայացնելիս:

Ամբաստանյալներ «Գաստիկ» մականվամբ Վահան Հակոբյանի, «Տլե» մականվամբ Սարգիս Հախանումյանի ու «Ծգլ» մականվամբ Սարգիս Գրիգորյանի պաշտպան Լուսինե Սահակյանը միջնորդում էր հաստատել մեքենայի խուզարկության արձանագրության, ինքնին մեքենայի ու դրանում հայտնաբերված առարկաների (որոնք ներկայացվել էին տարբեր փորձաքննությունների ու ճանաչվել որպես իրեղեն ապացույցներ) օգտագործման անթույլատրելիությունը:

Ըստ պաշտպանի՝ օրենքի խախտմամբ ձեռք բերված ապացույցները չեն կարող օգտագործվել որպես ապացույց: Լ.Սահակյանը նշեց, որ առարկաները պատշաճ կերպով փաթեթավորված չեն եղել, իսկ մեքենայի վրա ընդհանրապես բացակայել է որևէ կնիք կամ գոնե դրա հետքեր:

Լ.Սահակյանը նշեց նաև, որ խուզարկության արձանագրության մեջ նշված ընթերականերից մեկը դատարանում հարցաքննվելիս չի հիշել՝ մասնակցե՞ լ է խուզարկությանը, թե՝ ոչ, եթե անգամ մասնակցել էլ է, չի կարդացել խուզարկության արձանագրությունը:

Իսկ երկրորդ ընթերակայի տվյալներով՝ հասցեով ու ծննդյան տարեթվով, անձ ընդհանրապես առկա չէ Հայաստանում:

Պաշտպանը խնդրեց միջնորդության մասին որոշում կայացնել դատաքննության փուլում:

Մեղադրող Արամ Արամյանը առարկեց միջնորդության դեմ՝ հայտարարելով, որ ապացույցները ձեռք են բերվել օրենքի պահանջների խստիվ պահպանմամբ: Մեղադրողը հավելեց, որ մեքենայի վրա կնիքի բացակայությունը որևէ կերպ չի կարող կասկածի տակ դնել ապացույցի թույլատրելիությունը: «Երկար ժամանակ է անցել» մեղադրողի դիտարկմանն ի պատասխան՝  Լուսինե Սահակյանը նշեց, որ մյուս մեքենայի վրա կնիք կար, այն պատռված էր, բայց կար: Այդ պայմաններում պաշտպանական կողմը զրկվել է փորձաքննություններ պահանջելու հնարավորությունից:

Դատարանի՝ «Այլ միջնորդություններ ունե՞ք» հարցին Լուսինե Սահակյանը պատասխանեց, որ ապացույցների թույլատրելի կամ ոչ թույլատրելի ճանաչվելուց է կախված՝ ինքը նոր միջնորդություններ կանի՞, թե՝ ոչ:

«Դատարանը, հետաձգելով միջնորդության լուծումը, պաշտպանական կողմին զրկում է միջնորդություններ անելու հնարավորությունից,- հայտարարեց Լուսինե Սահակյանը՝ հավելելով,- պետք է զգույշ վերաբերվել ապացույցներին, այլապես դատավարությունն անիմաստ է դառնում, ստացվում է, որ կարելի էր վերցնել ու հաստատել մեղադրական եզրակացությունը ու դրանով վերջացնել»:

Ի պատասխան դատարանը հայտարարեց. «Պայմանով դատական նիստ ենք անում», ինչին հետևեց պաշտպանի արձագանքը. «Դուք եք պայմանով դատաքննություն անում: Դուք էլ եք հասկանում, որ ապացույցներ չկան, որ մեղադրողը պետք է հրաժարվի մեղադրանքից»,- ասաց Լուսինե Սահակյանը՝ դիմելով դատարանին:

Ամբաստանյալների շարքերում դժգոհություններ հնչեցին, ինչին ի պատասխան՝ դատարանը հարցրեց. «Ի՞նչ է պատահել»:

Հնչեց ամբաստանյալների պատասխանը. «ինչ եղել է, մեզ հետ է եղել, սկի գերմանացին այսպես պլեն չի պահել»:

Տուժողի իրավահաջորդի ներկայացուցիչ Երեմ Սարգսյանը հայտնեց, որ ինքն ունի դատաքննությունը լրացնող միջնորդություն, որը կներկայացնի հաջորդ նիստում, ուստի՝ խնդրեց դատական նիստը հետաձգել, դատարանը բավարարեց միջնորդությունը:

Հիշեցնենք՝ ըստ մեղադրական եզրակացության՝ Վահան Հակոբյանը մի խումբ անձանց կողմից նախնական համաձայնությամբ ապօրինի ձեռք է բերել և պահել մարտական ակոսափող հրազեն հանդիսացող, 1963թ. գործարանային արտադրության 7,62 մմ տրամաչափի «ԱԿՄՍ» տեսակի ինքնաձիգ, 1976թ. գործարանային արտադրության 7,62 մմ տրամաչափի «ԱԿՄ» տեսակի ինքնաձիգ և 1960թ. գործարանային արտադրության 7,62 մմ տրամաչափի «ԱԿՄ» տեսակի ինքնաձիգ, որոնք ապահովված են եղել պահունակներով, ինչպես նաև՝ ռազմամթերք հանդիսացող փամփուշտներով:

Ըստ մեղադրանքի՝ 2015թ. մարտի 4-ին՝ ժամը 13:50-ի սահմաններում, Վահան Հակոբյանը, Սարգիս Հախանումյանը և Սարգիս Գրիգորյանը, նախնական համաձայնությամբ, շատերի կյանքի համար վտանգավոր եղանակով, երկու և ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգներից կրակահերթ են արձակել (առնվազն 82 փամփուշտ) Լևոն Ղազարյանի, Դրաստամատ Թադևոսյանի և Մեսրոպ Նազարյանցի ուղղությամբ, որի հետևանքով ստացած հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադևոսյանը «Էրեբունի» բժշկական կենտրոն տեղափոխվելու ճանապարհին մահացել են:

Նախաքննական մարմինը որպես սպանության դրդապատճառ նշել է այն, որ Վահան Հակոբյանը «լարված, անբարյացակամ, գժտված վիճակում» է եղել Լևոն Ղազարյանի ու նրա շրջապատի հետ և, ըստ մեղադրական եզրակացության, սպանությունը կատարվել է վրեժխնդրությունից դրդված:

Աղբյուր` Փաստինֆո