Փաստ ինֆո

«Նորֆոլկ Քոնսալթինգ» ՍՊ ընկերության շուրջ ԱԱԾ կոռուպցիոն սկանդալային հայտարարությունը շարունակում է հետաքրքիր զարգացումներ ստանալ։

Նորանշանակ ՊԵԿ նախագահ Դավիթ Անանյանը չի շտապել որևէ գնահատական տալ՝ արդյոք հիշյալ ընկերությունը հարկեր թաքցրե՞լ է, թե՝ ոչ:

Սակայն նշել, որ «Նորֆոլկ» ընկերության ստեղծմամբ առաջին անգամ փորձ է արվել կիլոգրամով մաքսազերծում իրականացվող բեռները փաստաթղթավորել և ըստ տեսականու տրամադրել փաստաթղթեր, որոնք շրջանառության հարկով հարկման դեպքում համարվում էին ձեռքբերումը հիմնավորող փաստաթղթեր:

«Այն գործառույթը, որ իրականացնում էր «Նորֆոլկը», նախկինից ժառանգված մութ ու գաղտնի և կոռուպցիոն ռիսկերով թաթախված իրավիճակի շտկման նպատակադրումն է ունեցել»,-ասել է նորանշանակ ՊԵԿ նախագահը:

Նշենք, որ մինչ «Նորֆոլկ» ընկերության ստեղծումը մի շարք տոնավաճառների աշխատակիցներ իրենց ապրանքը մաքսազերծում էին կարգոների միջոցով: Մասնավորապես՝ Թուրքիայից, Չինաստանից և այլ երկրներից առևտրականների ապրանքի ներմուծումն իրականացվում էր 9 կարգո ընկերությունների միջոցով:

Այս ընկերությունները տարբեր երկրներից մեծածավալ ապրանքների ներկրմամբ ու մաքսազերծմամբ են զբաղվում և փոքր ու միջին տնտեսվարողների ապրանքներն արտերկրից տեղափոխում Հայաստան, «մութ» սխեմաներով իրականացնում մաքսազերծումը և դրանք հանձնում առևտրականներին:

Մամուլում հրապարակումներ եղան, որ հանցավոր համաձայնություն էր կիրառվում մաքսավորների ու կարգոների միջև. կոռուպցիոն շղթա էր գործում, առևտրաշրջանառության հսկայական ծավալ չէր հարկվում։ Կարգո ընկերությունները պատահական մարդկանց չէին պատկանում:

Ըստ մամուլի հրապարակումների՝ նրանց թվում են հայտնի «Կարգո Կառլենը»՝ «Չորս ընկեր» ՍՊԸ-ի տնօրեն Կառլեն Մկրտչյանը, «Բագրատ տուրի» ղեկավար Բագրատ Նավոյանը:

ՊԵԿ նախկին ղեկավարությունը «Նորֆոլկ» ընկերության ստեղծումը բացատրեց դաշտում կարգ ու կանոն հաստատելու անհրաժեշտությամբ: Ներկայիս ղեկավարությունը ևս, փաստորեն, այն կարծիքն է, որ այն անհամեմատ ավելի թափանցիկ է աշխատել։ Բայց ԱԱԾ-ն իր սկանդալային բացահայտումներն սկսեց հենց այս ոլորտից։ Ինչու՞։

Ավելին՝ նախօրեին ԱԱԾ տնօրեն Արթուր Վանեցյանը հայտարարեց, թե, ըստ նախնական քննության, ԱԱԾ-ի կողմից բացահայտված կոռուպցիոն սխեմաները 1,5 տարվա վաղեմություն ունեն, և որ բոլոր ապօրինի հարստացածները, կոռուպցիոն սխեմաներով հարստացածները և առհասարակ օրինախախտները, պատժվելու են:

Փաստերի համադրությամբ նշենք, որ նախկին ՊԵԿ նախագահ Վարդան Հարությունյանը հիշյալ պաշտոնը ստանձնել էր 2016թ. հոկտեմբերի 10-ին, ասել է թե 1,5 տարի առաջ: Ստացվում է, որ ԱԱԾ-ն «Նորֆոլկ Քոնսալթինգ» ՍՊ ընկերությանը, ՊԵԿ-ի նախկին ղեկավարությանն իր տեսադաշտում է պահել առաջին իսկ օրերից։

Հետաքրքիրն այն է, թե ինչու՞ ԱԱԾ տնօրենը պաշտոնավարումը ստանձնեց նախկին պաշտոնյաներին ԱԱԾ տեսադաշտում պահելու վերաբերյալ հստակ ազդակով:

Աղբյուր` Փաստինֆո