Փաստ ինֆո

Հայ ժողովրդի, Հայաստանի քաղաքացու բարօրությունն ու անվտանգությունը պետք է լինի առաջնահերթություն: Այս մասին Սարդարապատի հուշահամալիրում՝ լրագրողների հետ զրույցում նշեց ՀՀ տնտեսական զարգացման և ներդրումների նախարար Արծվիկ Մինասյանը՝ համոզմունք հայտնելով, որ նոր կառավարությունը՝  Նիկոլ Փաշինյանի գլխավորությամբ  այս սկզբունքներով է շարժվելու առաջ:

«Նախ տոնի առթիվ շնորհավորում եմ մեզ բոլորիս, աշխարհի բոլոր ծայրերում գտնվող մեր ժողովրդին: Օրվա խորհուրդը մեծ է, 1918 թվականին մեր անկախությունը, մեր պետականությունը ցույց տվեց այն, որ մեր ապագան միշտ մեր ձեռքերում պետք է պահենք: Ցանկացած գործողության հիմքում որպես առաջնահերթություն պետք է լինի հայ ժողովրդի, Հայաստանի քաղաքացու բարօրությունն ու անվտանգությունը: Ես համոզված եմ, որ մեր նոր կառավարությունը  Նիկոլ Փաշինյանի գլխավորությամբ  այս սկզբունքներով է շարժվելու առաջ»,- «Արմենպրես»-ի հաղորդմամբ՝ ասաց Արծվիկ Մինասյանը:

Լրագրողները հետաքրքրվեցին՝ Արծվիկ Մինասյանին ավելի շատ Բնապահպանության, թե  Տնտեսական զարգացման և ներդրումների նախարարությունում աշխատելն է հարմարավետ: Հարցին ի պատասխան, Արծվիկ Մինասյանը նշեց, որ Բնապահպանության նախարար աշխատելն (27.09.2016-12.05.2018) իրեն տվեց մեծ հնարավորություն ու փորձառություն:

«Հայաստանի տնտեսական զարգացումն ու առաջընթացն, առանց շրջակա միջավայրի պատշաճ պահպանման, անհնար է, որովհետև յուրաքանչյուր տնտեսական աճ առնվազն իր մեջ պետք է ներառի 3 կարևոր բաղադրիչ՝ սոցիալական ներառականություն, բնապահպանական ընդունելի լուծումներ, տնտեսական կայուն առաջընթաց: Այս 3 բաղադրիչն անհրաժեշտ է, որ տնտեսական ցանկացած աճ դիտվի որպես զարգացում»,-ասաց Արծվիկ Մինասյանը:

Լրագրողները նկատեցին, որոշ մարդիկ թերահավատորեն են մոտենում նոր կառավարությանը, քանի որ այն համալրվել է բավական երիտասարդ ու անփորձ կադրերով: Նույնիսկ մտավախություն կա, որ նոր կառավարությունը չի հաջողի: Արծվիկ Մինասյանը նշեց, որ զգուշավորություն պետք է, բայց մտավախություն կարծիք չկա:

«Համոզված եմ, որ երիտասարդ լինելով հանդերձ, երբ փորձի և ապագայի նկատմամբ մեր պատկերացումների հիմքում դնում ենք ազգային պետական արժեքները, մենք ունենում ենք հաջողություն: Որևէ մեկը չի ծնվել նախարար կամ կառավարման հմտությունները ձեռքբերելով, բայց շատ կարևոր է, որ արագ, մեր սկզբունքներին համահունչ առաջ գնանք»,-ասաց նախարար:

Այն հարցին, թե արդյո՞ք անհրաժեշտություն կա կառավարությունում պատասխանատվությունը փաստաթղթով ամրագրվի, Արծվիկ Մինասյանը նշեց, որ դա քաղաքական ուժերի միջև քննարկման հարց է: Առաջիկայում կներկայացվեն մանրամասներ:

Մայիսի 12-ին ՀՀ վարչապետի առաջարկով ՀՀ նախագահ Արմեն Սարգսյանի հրամանագրով Արծվիկ Մինասյանը նշանակվել է ՀՀ տնտեսական զարգացման եւ ներդրումների նախարար: Մինչ այդ Արծվիկ Մինասյանն աշխատում էր Բնապահպանության նախարարի պաշտոնում: Նոր կառավարության կազմում շատ են երիտասարդները, ովքեր հանրությանը հայտնի էին միայն մայիսի 8-ին ՀՀ վարչապետ ընտրված Նիկոլ Փաշինյանի նախաձեռնած քաղաքացիական պայքարից և նախկինում երբեք պետական պաշտոններ չէին զբաղեցրել:

Աղբյուր` Փաստինֆո