Փաստ ինֆո

Ձմեռային տրանսֆերային պատուհանի ընթացքում «Ալաշկերտ»-ի գլխավոր ձեռքբերումներից մեկը Սերբիայի Սուպերլիգայի մի շարք թիմերում հանդես եկած դարպասապահ Օգնյեն Չանչարևիչն էր: Այս մասին գրում է armsport.am-ը:

Նախորդ տարի Սերբիայի ազգային հավաքական հրավիրված 28-ամյա դարպասապահը, ով կարճ ժամանակում իր տեղն է գրավել «Ալաշկերտի» հիմնական կազմում, ակումբի մամուլի քարտուղարության հետ զրույցում խոսել է մի շարք հարցերի մասին.

«Ալաշկերտում» և Հայաստանում ինձ շատ լավ եմ ինձ զգում:

Նույնը կարող եմ ասել ընտանիքիս մասին: Այս երկրում ապրելն իսկական հաճույք է: Կինս և որդիս ապրում են ինձ հետ, որոշ ժամանակ մեզ հետ այստեղ էր նաև մայրս: Երևանը մեզ դուր է գալիս. գեղեցիկ քաղաք է, որտեղ տեսնելու շատ բան կա»,- ասել է սերբ դարպասապահը:

 Ֆուտբոլիստը խոսել է նաև առաջին իսկ մրցաշրջանում Հայաստանի չեմպիոնի կոչումը նվաճելու մասին.

«Շատ ուրախ եմ, որ դարձանք Հայաստանի չեմպիոն: Դա պարզապես անմոռանալի էջ է իմ կարիերայում: Ցավոք, չկարողացանք նվաճել նաև Հայաստանի Գավաթը, չնայած որ շատ մոտ էինք դրան:

«Ալաշկերտում» իմ հաջորդ և գլխավոր նպատակը Չեմպիոնների լիգայում հաջող մրցելույթներն են: Պետք է շատ լավ պատրաստվենք և որքան հնարավոր է առաջ գնանք»:

Չանչարևիչը նաև նշել է, որ Հայաստանի առաջնությունը, չնայած` շատ տարբեր է Սերբիայի Սուպերլիգայից, իրեն դուր է գալիս.

«Սերբ խաղընկերներս ինձ շատ են օգնել «Ալաշկերտում» հարմարվելու առումով: Հայաստանի առաջնությունը տարբերվում է Սերբայի Սուպերլիգայից: Այստեղ բավականին արագ և հարձակվողական ոճով են գործում` ավելի քիչ ուշադրություն դարձնելով պաշտպանությանը:

Հետաքրքիր մրցաշար է, ինձ դուր է գալիս այստեղ խաղալը»:

Սերբ դարպասապահն ավելի քան 150 հանդիպում է անցկացրել Սերբիայի Սուպերլիգայում` բազմիցս մրցելով «Պարտիզանի» և «Ցրվենա Զվեզդայի» կարգի թիմերի հետ: Ֆուտբոլիստը խոսել է նաև այն մասին, թե ինչ է իրեն տվել այդ փորձը.

«Դա շատ մեծ փորձ էր ինձ համար: 30-40 հազար հանդիսատեսի առջև խաղալը մեծ վստահություն է հաղորդում ֆուտբոլիստին: Սերբիայում ավելի շատ ուշադրություն են դարձնում տակտիկական պայքարին, բազմաթիվ խաղեր գոլազուրկ ոչ-ոքիով կամ նվազագույն հաշվով են ավարտվում»:

Ֆուտբոլիստը, ով նախորդ տարի հրավիրվել է Սերբիայի հավաքական` ԱՄՆ-ի ընտրանու հետ ընկերական խաղին մասնակցելու համար, խոսել է հայրենիքում բարձր մրցակցության մասին.

«Գիտեք, Սերբիայում բազմաթիվ բարձրակարգ դարպասապահներ կան և մրցակցությունը շատ մեծ է: Այդ հրավերը և ազգային թիմի ճամբարում գտնվելը շատ մեծ վստահություն, փորձ և անմոռանալի պահեր պարգևեցին ինձ: Մեծ ցանկություն և հույս ունեմ, որ կարժանանամ նաև նոր մարզիչի հրավերին. Շատ բան կախված է իմ ելույթներից», -ասել է Չանչարևիչը:

28-ամյա դարպասապահը խոսել է նաև հայ և սերբ ժողովուրդների նմանության, սովորած հայերեն բառերի և այն մասին, թե ինչ մթնոլորտ է տիրում թիմի ներսում.

«Հայերը շատ բարեհամբույր են, «Ալաշկերտում» ինձ շատ լավ ընդունեցին: Մեծ սիրով շփվում և մտերմություն եմ անում բոլոր խաընկերներիս հետ:

Ինքս էլ ընկերասեր անձնավորություն եմ, կարծում եմ, որ այլ կերպ չէր էլ կարող լինել: Մեր հանդերձարանում պարզապես հիանալի մթնոլորտ է: Ընդհանրապես հայերն ու սերբերը շատ նմանություններ ունեն:

Պատմականորեն երկու ազգերն էլ պայքարել են իրենց ազատության համար: Հայաստանում քեզ միշտ ցանկանում են օգնել` ինչով որ կարող են:

Իսկ հայերենից դեռևս միայն այս բառերն եմ սովորել` «Բարև Ձեզ», «ո՞նց ես», «ախպեր», «լավնա», «աջ», «ձախ», «դուրս»:

Աղբյուր` Փաստինֆո