Փաստ ինֆո

Դատարանի կայացրած դատավճռով «Վալենսիա» ՀՁ ՍՊԸ-ի մարքետինգի մենեջեր Արսեն Ավանեսյանը դատապարտվել է ազատազրկման, իսկ ընկերության խորհրդատու-վաճառող Ներսես Հայրապետյանը՝ արդարացվել:

Երևան քաղաքի դատարանը՝ դատավոր Ռ.Պապոյանի նախագահությամբ, Արսեն Ավանեսյանին մեղավոր է ճանաչել ՀՀ քրեական օրենսգրքի 179-րդ հոդվածի 3-րդ մասի 1-ին կետով՝ առանձնապես խոշոր չափերի յուրացում, առաջադրված մեղադրանքում, և նրան դատապարտել հինգուկես տարվա ազատազրկման:

Իսկ Ներսես Հայրապետյանը ՀՀ քրեական օրենսգրքի 214-րդ հոդվածի 2-րդ մասով՝ առևտրային կամ այլ կազմակերպության ծառայողի կողմից լիազորությունները չարաշահելը, որն առաջացրել է ծանր հետևանքներ, առաջադրված մեղադրանքում արդարացվել է:

Դատավճռով ամբաստանյալ Արսեն Ավանեսյանից հօգուտ տուժող «Վալենսիա» ՀՁ ՍՊ ընկերության բռնագանձվելու է 98.724.750 ՀՀ դրամ գումար որպես հանցագործությամբ պատճառված վնասի հատուցում:

Ըստ մեղադրանքի, Արսեն Ավանեսյանը՝ ստանձնելով նյութական պատասխանատվություն, ընկերության կողմից իրեն հանձնված խոհանոցային սարքավորումերի համար՝ Ա.Ավանեսյանը 2010 թվականից մինչև 2014 թվականն ընկած ժամանակահատվածում կանխիկ գործարքներով վաճառել է ընկերությանը պատկանող որոշ քանակի խոհանոցային սարքավորումներ ու սպասքի պարագաներ՝ յուրացնելով դրանց վաճառքից գոյացած առանձնապես խոշոր չափի՝ 114.499.340 ՀՀ դրամ գումարը:

Ի դեպ, Արսեն Ավանեսյանի կողմից մասնակի վերականգնվել է հանցագործությամբ պատճառված վնասը, ուստի տուժողի ներկայացուցիչը ներկայացրել է քաղաքացիական հայց 98.724.750 ՀՀ դրամի չափով:

Իսկ ըստ Ներսես Հայրապետյանին առաջադրված մեղադրանքի, նա չարաշահել է իր լիազորությունները, որի հետևանքով առաջացել են ծանր հետևանքներ:

Դատարանը հաստատված է համարել Արսեն Ավանեսյանին առաջադրված մեղադրանքը, իսկ Ներսես Հայրապետյանին առաջադրված մեղադրանքը՝ ոչ: Ուստի գտել է, որ պետք է արդարացնել ու ճանաչել Ներսես Հայրապետյանի անմեղությունը և նրա նկատմամբ կայացնել արդարացման դատավճիռ՝ արարքում հանցակազմի բացակայության հիմքով:

Դատարանը փաստել է, որ լիակատար նյութական պատասխանատվության պայմանագրով և աշխատանքային պայմանագրով Ն. Հայրապետյանը պատասխանատվության ենթակա պարտավորություններ (կարգադրիչ կամ այլ լիազորություններ) է ստանձնել բացառապես կազմակերպության կողմից իրեն վստահված արժեքների պահպանման լրիվ նյութական պահպանության համար:

Մինչդեռ քրեական գործով ձեռք բերված և դատաքննության ընթացքում հետազոտված որևէ ապացույցով և որևէ փաստական տվյալով չի հիմնավորվել Ներսես Հայրապետյանի կողմից «Վալենսիա» ՀՁ ՍՊ ընկերությունում աշխատելու ընթացքում նրան ընդունման-հանձնման ակտով գույք, մասնավորապես, խոհանոցային սարքավորումներ և սպասքի պարագաներ հանձնելու, կամ նրա կողմից ստորագրությամբ այդպիսի գույք ընդունելու հանգամանքը:

Միևնույն ժամանակ հիմնավորվել է, որ ընդունվելով աշխատանքի, Արսեն Ավանեսյանը` 09.09.2009թ. ընկերության «խոհանոցային սարքեր և սպասքի տաղավար» պահեստում կատարված գույքագրմամբ ընդունման հանձնման ակտով ընդունել է տարբեր տեսակի ապրանքներ:

Աղբյուր` Փաստինֆո