Փաստ ինֆո

ԱԺ «Ելք» խմբակցության պատգամավոր Էդմոն Մարուքյանն առայժմ ձեռնպահ է մնում հայտարարել, թե որ քաղաքական ուժն է պատասխանատվություն կրելու Նիկոլ Փաշինյանի կառավարության համար։ Նկատենք, որ Նիկոլ Փաշինյանը մինչ վարչապետ նշանակվելը եղել է հենց այդ խմբակցության ղեկավարը։

Ըստ Էդմոն Մարուքյանի՝ բնականաբար բոլորը պատասխանատու են իրենց ներկայացրած թեկնածուների համար, երկրորդ՝ կառավարության ծրագրի համար, որովհետև երբ ծրագիրը գա ԱԺ, հաստատելու են:

Նրա խոսքերով՝ եթե կառավարությունը ձևավորած 3 խմբակցությունների միջև ստորագրվի հուշագիր, դրանք կկոչվեն կառավարող կուսակցություններ, իսկ ով դուրս կմնա, կլինի ընդդիմադիր:

«Ես այս պահին չեմ կարող հերքել, որ կլինի հուշագիր կամ չի լինի: Վարչապետը հրավիրել է աշխատելու համերաշխության կառավարությունում, խմբակցությունների կողմից մասնագետներ են նշանակվել և պրոցեսը գնում է առաջ»,- ասաց Է.Մարուքյանը:

Նա խորհուրդ տվեց, ոչ թե սպասել, թե երբ է ձախողելու կառավարությունը, այլ աջակցել, որ չձախողի. «Նախ՝ վստահեցնում եմ, որ ձախողում չի լինելու, երկրորդ՝ եթե հիպոտեթիկ ձախողի, դա կլինի ՀՀ ձախողում: Եթե հուշագիր ստորագրվի, այդ դեպքում պատասխանատվության բեռն ավելի կմեծանա»:

Է.Մարուքյանը հորդորեց սպասել կառավարության ծրագրի հաստատմանը, երբ ավելի պարզ կլինի՝ կլինի՞ հուշագիր, թե՝ ոչ: Ինչ վերաբերում է հնարավոր արտահերթ ընտրություններին, ապա պատգամավորը նորմալ է համարում ՀՀԿ-ի կողմից հնչող հայտարարությունները, որ դրա անհրաժեշտությունը չկա։ Ինչպես նկատեց Մարուքյանը՝ ՀՀԿ-ն չի ուզում արտահերթ ընտրություններ, որովհետև եթե հիմա 58 մանդատ ունի, պարզ չի՝ ընտրություներից հետո կունենա՞ն այդքան:

Նա ձեռնպահ մնաց մասնագիտական գնահատական տալ ԶՈՒ գլխավոր շտաբի պետի պաշտոնում Արտակ Դագթյանի նշանակմանը։ Նշենք, որ այն քննադատության է արժանացել մասնագետների, մասնավորպաես Արցախի նախկին փոխվարչապետ, ՀՀ պաշտպանության նախարարի նախկին տեղակալ Արթուր Աղաբեկյանի կողմից։
«Ես Զինված ուժերում ծառայել եմ, բայց զինվորական մասնագիտություն չունեմ:

Ես ինձ զինվորական մասնագիտության գիտակ չեմ համարում: Միայն լավն եմ իմացել ԶՈՒ ԳՇ նորանշանակ պետի մասին: Եթե պարոն Աղաբեկյանն ինչ-որ մտահոգություններ ունի, կարող է այլ խողովակներով փոխանցել վարչապետին, ոչ թե հրապարակային»,- հայտարարեց «Ելք» խմբակցության պատգամավոր Էդմոն Մարուքյանը՝ նշելով, որ նախկին իշխանություններն իրենք էին ասում, որ «հարևանները կլսեն». «Ես կարծում եմ՝ հրապարակային սխալ է նորանշանակ ԶՈՒ ԳՇ պետի մասին արտահայտվել: Փաշինյանն այս նշանակումը կատարելիս բազմաթիվ կոնսուլտացիաներ է ունեցել և, եթե հանգել է այս նշանակմանը, բնականաբար, դրա մեջ կա տրամաբանություն»,- ասում է Մարուքյանը:

Հիշեցնենք, որ Ա.Աղաբեկյանը ֆեյսբուքյան իր էջում մտահոգություն է հայտնել Զինված ուժերի Գլխավոր շտաբի պետի պաշտոնում գեներալ-մայոր Արտակ Դավթյանի նշանակմամբ։

«Արդեն 10 տարուց ավելի է ինչ թողել եմ Զինված ուժերը, բայց, ի տարբերություն, բանակը թողած շատ գեներալների, երբեք անտարբեր չեմ եղել Զինված ուժերում իրականացվող թե բարեփոխումների և թե կադրային քաղաքականության նկատմամբ, միշտ ունեցել եմ հստակ կարծիք, որի հետ հաշվի են նստել բոլոր ժամանակների նախարարները և մեծ ու փոքր պետերը։ Պարտավոր եմ հրապարակային բարձրաձայնել իմ կարծիքը Գլխավոր շտաբի նորանշանակ պետի նշանակման վերաբերյալ։ Արտակին ճանաչում եմ 1994 թվականից, երբ դեռ Մեղրիի գնդի շտաբի պետն էր՝ խիզախ կապիտան։ Իր հետագա կարիերիայում մեծ դեր եմ ունեցել։ Պարտավոր եմ ահազանգել, ամենաանպատրաստ գեներալը նշանակվել է ամենապատասխանատու պաշտոնին։ Անկեղծ անհանգիստ եմ», – գրել է նա։

Աղբյուր` Փաստինֆո