Փաստ ինֆո

ՀՀ Ազգային ժողովի նախագահ Արա Բաբլոյանը քաղաքական ուժերի կոնսենսուսի գալու պարագայում չի բացառում ՀՀ ընտրական օրենսգրքի փոփոխությունը: ԱԺ նախագահը նման կարծիք հայտնեց «Հայաստան» համահայկական հիմնադրամի հոգաբարձուների խորհրդի նիստին լրագրողների հետ ճեպազրույցում: Հիշեցնենք， որ նա նաեւ նշել է， որ արտահերթ ընտրություններ անցկացնելու հիմք չի տեսնում այս պահին։

«Տարբեր քաղաքական ուժեր տարբեր դիրքորոշումներ ունեն: Կարծում եմ՝ ժողովրդավարական մոտեցումները և Սահմանադրությունը պաշտպանելու իմաստն այն է, որ կարողանանք մեր քայլերը համահունչ կազմակերպել և չստեղծել նախադեպ՝ Սահմանադրությունից դուրս որևէ քայլ իրականացնելու: Եթե քաղաքական ուժերը գան կոնսենսուսի, որ պետք է որոշակի փոփոխություն կատարել Ընտրական օրենսգրքում, ինչ խոսք, կկատարվի»,-ասաց Բաբլոյանը:

«Ամեն քաղաքական ուժ իրավունք ունի իր դիրքորոշումը ներկայացնելու: Եվ դրանք կարող են փոխվել, շտկվել միայն բանակցությունների և քննարկումների արդյունքում»,-նշեց նա:

Մամուլում շրջանառվող տեղեկությունների համաձայն՝ Նիկոլ Փաշինյանի վարչապետ նշանակվելուց հետո «Իրազեկ քաղաքացիների միավորում» հասարակական կազմակերպության համակարգող Դանիել Իոաննիսյանն սկսել է ընտրական նոր օրենսգրքի մշակման աշխատանքները։

«Ազատության» եթերում Իոաննիսյանը հույս է հայտնել, որ հունիսի 20-ին Ընտրական նոր օրենսգիրքն արդեն պատրաստ կլինի։ Ըստ նրա՝ Ընտրական օրենսգիրքը պետք է վերջնական ուժի մեջ մտած լինի ընտրություններից առնվազն երկու ամիս շուտ։

«Իմ մասով և մեր թիմի մասով ասեմ, որ մենք ուզում ենք ամեն ինչ անել, որ հունիսի 20-ին ունենանք նախագիծը՝ արդեն գրված տեսքով, որը կարտացոլի նաև Ընտրական օրենսգրքի փոփոխության կառավարության տեսլականը։ Մենք հիմա սերտորեն կառավարության հետ ենք աշխատում, մենք աշխատում ենք հասարակական կազմակերպությունների հետ, այլ հասարակական կազմակերպությունների, որոնք, օրինակ, հաշմանդամների իրավունքներով են զբաղվում, ազգային փոքրամասնություններով, քաղաքական ուժերի հետ ենք մենք հանդիպում»,- ասել է Իոաննիսյանը։

Հարցին, թե խորհրդարանում մեծամասնություն կազմող Հանրապետական խմբակցության հետ հանդիպում լինելո՞ւ է, ի վերջո մեծամասնությունն Ազգային ժողովում իրենք են և իրենց միջոցո՛վ օրենսդրական փոփոխությունները պետք է կայանան, «Իրազեկ քաղաքացիների միավորում» ՀԿ համակարգողը պատասխանեց. «Մենք պլանավորում ենք իրենց հետ քննարկել, բայց մենք չենք իրենց համոզողը, իրենց համոզելու ֆունկցիան մեզ վրա չէ։

Ես համարում եմ, որ իրենց համոզելը հնարավոր կլինի, բայց դա մենք չէ, որ պետք է անենք։ Մեր խնդիրն առավելագույնս լավ նախագիծ ստեղծելն է, այսինքն՝ մենք դրա համար Հանրապետականների և մյուսների հետ խոսելու ենք բովանդակությունից և ոչ թե իրենց համաձայնությունը ձեռք բերելուց, որովհետև ինչքան ես հասկանում եմ, ռեյտինգային ընտրակարգի հետ կապված իրենք այդքան էլ դրական չեն տրամադրված, բայց ռեյտինգային ընտրակարգը դա մի բան է, որը քննարկման անգամ առարկա չի լինելու»։

Լուսանկարը՝ Sputnik-ի

Աղբյուր` Փաստինֆո