Փաստ ինֆո

Որդուն պաշտպանելու համար վեճին միջամտած հոր սպանության գործով ամբաստանյալ Աշոտ Բաղդասարյանին ՀՀ քրեական օրենսգրքի 104-րդ հոդվածի՝ սպանությունը, 1-ին մասով առաջադրված մեղադրանքը այսօր կայացված դատավճռով վերաորակվել է ՀՀ քրեական օրենսգրքի 108-րդ հոդվածի 1-ին մասով՝ անհրաժեշտ պաշտպանության սահմանազանցմամբ սպանությունը:

Երևան քաղաքի դատարանը՝ դատավոր Տաթևիկ Գրիգորյանի նախագահությամբ , Աշոտ Բաղդասարյանին մեղավոր է ճանաչել ՀՀ քրեական օրենսգրքի 108-րդ հոդվածի 1-ին մասով և 235-րդ հոդվածի 1-ին մասով՝ ապօրինի կերպով զենք ձեռք բերելը, պահելը, կրելը, և դատապարտել ընդհանուր առմամբ 5 տարվա ազատազրկման:

«Փաստինֆո»-ի լրագրողի հետ զրույցում Աշոտ Բաղդասարյանի պաշտպան Երեմ Սարգսյանը նշեց, որ ապօրինի զենքի մասով նախաքննության փուլից իր պաշտպանյալն իրեն մեղավոր էր ճանաչել և ինքնակամ զենքը ներկայացրել: «Իսկ սպանության մեղադրանքով ի սկզբանե մենք նշում էինք, որ այստեղ սպանություն տեղի չի ունեցել: Չնայած որ Աշոտ Բաղդասարյանն ընդունել էր, որ իր գործողությունների հետևանքով՝ կրակոց է արձակել, մահացել է, սակայն պնդում էինք և հիմնավորում էինք, որ այստեղ սպանություն չկա, դիտավորություն չի եղել և ըստ մեզ՝ պաշտպանական կողմի խորին համոզմամբ, իրականում անհրաժեշտ պաշտպանություն է տեղի ունեցել, և դա չպետք է հանցագործություն դիտարկվեր, ինչի վերաբերյալ մանրամասն ճառով նաև հիմնավորումներ ներկայացրեցինք»,- ասաց Ե.Սարգսյանը:

Պաշտպանը գտնում է, որ այս պարագայում արդարությունը որոշակի առումով վերականգնվեց: «Իմ խորին համոզմամբ, դա իրականում անհրաժեշտ պաշտպանություն է, և Ա.Բաղդասարյանը պետք է մեղավոր ճանաչվեր միայն ապօրինի զենք ձեռք բերելու, կրելու համար: Այնուամենայնիվ հաշվի առնելով մեր առկա իրականությունը, եզակի դեպքերում է, որ սպանության մեղադրանքը վերաորակվում է անհրաժեշտ պաշտպանության կամ գոնե սահմանազանցման, սա արդեն իսկ համարում ենք հաղթանակ»,- ասաց Երեմ Սարգսյանը հավելելով, որ պաշտպանյալի հետ քննարկելուց հետո չի բացառվում, որ այս կապակցությամբ նաև կդիմեն Վերաքննիչ դատարան՝ վերաքննիչ բողոքում ներկայացնելով հիմնավորումներ, որ սա իրականում անհրաժեշտ պաշտպանություն է:

Նշենք, որ պաշտպանական ճառում Աշոտ Բաղդասարյանը նշել էր, որ իր պաշտպանի ճառից հետո այլևս ավելացնելու բան չունի:

Իր ցուցմունքում ամբաստանյալը նշել է, որ ակնհայտ է, որ ինքը որևէ մեկին սպանելու, նույնիսկ վնասելու դիտավորություն չի ունեցել, դրա համար ի սկզբանե իր մոտ զենք չի եղել: Գնացել է զրուցելու և պարզաբանելու նպատակով, սակայն այն պահից սկսած, երբ որ դանակով հարվածներ է ստացել, ընդ որում 18 վնասվածք է ստացել սուր կտրող-ծակող գործիքներով, և վնասվածքներ ստանալու ընթացքում զենքը վերցրել է մեքենայից: Ըստ ամբաստանյալի ցուցմունքի, եթե ինքը սպանելու նպատակ ունենար, առաջին կրակոցն օդ չէր արձակի, հետագա հարվածներից պաշտպանվելու համար զենքի բռնակով չէր հարվածի անձի գլխին, այլ միանգամից կենսականորեն կարևոր օրգանները կվնասեր: Դա չէր արել, նույնիսկ կրակելու ժամանակ կրակոցներն ուղղել էր դեպի ոտքերը, սակայն մի կրակոց լարված իրավիճակում կիսակռացած դիրքից զենքը մի քիչ վերև էր պահվել, դեպի թիկունքն էր ուղղվել, մյուս երկու վնասվածքները գոտկատեղից ներքև, գոտկատեղի հատվածում են եղել:

Լուսանկարում ՝ Երեմ Սարգսյանն է:

Աղբյուր` Փաստինֆո