Փաստ ինֆո

ԱԺ ՀՀԿ-ական պատգամավոր Միհրան Պողոսյանը կարծում է, որ իր օգնականը ձերբակալվել է թյուրիմացության արդյունքում և հույս է հայտնում, որ իր օգնականի մասնակցությամբ Երևանի Կ.Ուլնեցի փողոցում ապրիլի 21-ին տեղի ունեցած բռնությունը՝ մահակներով ավտոմեքենաների և քաղաքացիների վրա հարձակվելը, իրականությանը չի համապատասխանում:

Միհրան Պողոսյանն ակնկալում է, որ համապատասխան մարմինները անաչառ կգտնվեն, և 1-2 օրվա ընթացքում ամեն ինչ կպարզվի:

«Իմանալով իմ օգնականին՝ հույս եմ հայտնում և վստահություն, որ նա նշված վայրում չի եղել և որ սա թյուրիմացություն է: Ես հորդորում եմ համապատասխան մարմիններին, որ իրենք անաչառ լինեն, որոշակի վենդետաներ և քայլեր, որոնք հիմնավորված չեն լինելու ու հետագայում պարզվելու են, որ դրանք հիմք չեն ունեցել, չանեն։ Ի վերջո, ամեն ինչ պարզվելու է ու մենք համապատասխան հիմքեր ենք ներկայացնելու, թե որտեղ է եղել այդ երիտասարդը»,-լրագրողների հետ ճեպազրույցում ասաց Պողոսյանը:

Հարցին Դուք երաշխավորո՞ւմ եք, որ Ձեր օգնականը տվյալ միջադեպին մասնակից չի եղել, Պողոսյանը պատասխանեց. «ես կարող եմ երաշխավորել միայն ինձ համար»:

Քննչական կոմիտեն ավելի վաղ տեղեկացրել էր, որ նախնական տվյալներով՝ 2018թ. ապրիլի 21-ին՝ ժամը 13:30-ի սահմաններում, Երևան քաղաքի Կ.Ուլնեցի փողոցում մի քանի երիտասարդ մահակներով հարվածել և վնասել են քաղաքացիների կայանված ավտոմեքենաները՝ պատճառելով նյութական վնաս:

Մասնավորապես՝ ձեռք բերված փաստական տվյալների համաձայն՝ քաղաքացիներն ապրիլի 21-ին մասամբ փակել են Երևան քաղաքի Կ.Ուլնեցու փողոցի ավտոճանապարհի երթևեկելի հատվածը, որի ժամանակ նրանց է մոտեցել «Պորշ» մակնիշի երկու ավտոմեքենա, որոնցից իջել են մի խումբ անձինք և մահակներով հարվածել փողոցը փակած, ինչպես նաև՝ նշված տարածքով անցնող ավտոմեքենաներին և վարորդներին:

Այս քերական գործի շրջանակներում արդեն կա մեկ ձերբակալված անձ, վերջինս Միհրան Պողոսյանի օգնականն է:

Աղբյուր` Փաստինֆո