Փաստ ինֆո

2016թ. նոյեմբերի 13-ին Շենգավիթում «Լիա» գեղեցկության սրահում տեղի ունեցած աղմկահարույց սպանության գործով այսօրվա դատական նիստում լրացուցիչ հարցաքննության համար դատարան հրավիրված ամբաստանյալ Պետրոս Իսրայելյանի որդին՝ վկա Գոռ Իսրայելյանը, հրաժարվեց որևէ հարցի պատասխանել:

Ինչ վերաբերում է վկա Միսակ Միրիջանյանին, ապա դատարանը նրա նկատմամբ բերման որոշում կայացրեց:

Նշենք նաև, որ այսօր դատաքննությունը լրացնելու միջնորդությամբ հանդես եկավ ամբաստանյալ Ալիկ Բանդուրյանի պաշտպան Երեմ Սարգսյանը: Պաշտպանը միջնորդեց Երևան քաղաքի ընդհանուր իրավասության դատարանից պահանջել 2016թ. հոկտեմբերի 13-ին ՀՀ ոստիկանության պետի նախկին առաջին տեղակալ Հունան Պողոսյանի կողմից դատարանին ներկայացված Ա. Գասպարյանի կողմից օգտագործված 2 բջջային հեռախոսահամարների նկատմամբ «հեռախոսային խոսակցությունների վերահսկում» օպերատիվ-հետախուզական միջոցառում իրականացնելու թույլտվություն ստանալու վերաբերյալ միջնորդության և դրան կից ներկայացված նյութերի պատճենների, ինչպես նաև՝ նշված միջնորդության քննարկման համար կայացված դատական նիստերի արձանագրությունները ու դրանց լազերային կրիչները:

Բացի այդ, պաշտպանը նաև միջնորդեց դատարանից պահանջել Ալիկ Բանդուրյանի և Արմեն Գասպարյանի նկատմամբ «Ներքին դիտում» օպերատիվ-հետախուզական միջոցառում իրականացնելու թույլտվություն ստանալու վերաբերյալ միջնորդությունների, դրանց կից ներկայացված նյութերի, այդ միջնորդությունները քննարկելու վերաբերյալ դատարանի որոշումների պատճենները, ինչպես նաև՝ նշված միջնորդությունների քննարկման համար կայացված դատական նիստերի արձանագրությունները և լազերային կրիչները:

Մասնավորապես, պաշտպանն օբյեկտիվ կասկածներ ունի, որ դատարանի այս որոշումները չեն կայացվել օրենքով սահմանված օրինական հիմքերի և ընթացակարգերի պահպանմամբ, ուստի՝ մրցակցության սկզբունքի կանոններով պատրաստվում է վիճարկել ինչպես այդ որոշումների, այնպես էլ՝ դրանց հիման վրա իրականացված գաղտնալսումների և ներքին դիտումների օրինականության հարցը:

Միևնույն ժամանակ պաշտպանը նաև նշեց, որ դիմել է Երևան քաղաքի ընդհանուր իրավասության դատարանի նախագահ Վարդազարյանին՝ խնդրելով իրեն տրամադրել նշված դատարանի որոշումների պատճենները, դատական նիստերի արձանագրությունները, լազերային կրիչները, սակայն ի պատասխան հայտնել են, որ պահանջված միջնորդությունների և դրանց կից նյութերի, դատական նիստերի արձանագրությունների՝ լազերային կրիչների պատճենների տրամադրումը մերժվում է, քանի որ դրանք օրենքով սահմանված կարգով գաղտնազերծված չեն:

Պաշտպանի միջնորդությանն առարկեց մեղադրող Գևորգ Գևորգյանը՝ կարծիք հայտնելով, որ նախագահող դատավորի լիազորությունների շրջանակից դուրս է գնահատական տալ հավասարազոր դատավորի գործողություններին և պաշտպանը չի օգտվել օրենքով իրեն վերապահված լիազորություններից՝ վերաքննության կարգով դատարանի որոշումները բողոքարկելու հնարավորությունից:

Երեմ Սարգսյանն էլ, հակադարձելով դատախազին, ասաց՝ ընդամենը փաստաթուղթ է պահանջում դատարանից և ոչ թե գնահատական՝ մեկ այլ հավասարազոր դատավորի գործողությունների վերաբերյալ:

Դատարանը պաշտպանի միջնորդության վերաբերյալ որոշում կկայացնի հաջորդ դատական նիստում:

Աղբյուր` Փաստինֆո