Փաստ ինֆո

Ֆեյսբուքյան գրառման մեջ դատական համակարգի վերաբերյալ հանրային քննարկումների, դատական համակարգի անկախ գործունեության ու գործառույթներին է այսօր անդրադարձել փաստաբան Արմեն Ֆերոյանը: Ստորև ներկայացնում ենք գրառումն ամբողջությամբ.

«Հաշվի առնելով վերջին շրջանում դատական համակարգի վերաբերյալ լայնածավալ հանրային քննարկումները, ցանկանում եմ փաստել, որ քրեական գործերի շուրջ հանրային քննարկումները, հատկապես՝ դատաքննության փուլում, կարող են ճնշում գործադրել դատարանի նկատմամբ, ինչը ցանկալի մոտեցում չէ և չի բխում առաջին հերթին արդարադատության շահերից:

Նման մոտեցման արդյունքում հնարավոր չէ խոսել անկախ և անկողմնակալ դատական համակարգի մասին, քանի որ մինչև դատական համակարգը զերծ չլինի որևէ լուրջ ճնշումներից, դատարանը չի կարող գործել անկախ և անկաշկանդ: Անշուշտ, դատական համակարգն այն կառույցն է, որից հնարավոր չէ, որ բոլորը գոհ լինեն. կայացված դատական ակտից դժգոհ յուրաքանչյուր անձ կարող է այդ դատական ակտը դարձնել հանրային քննարկման առարկա իրեն ձեռնտու տեսանկյունից, իսկ քննարկման մասնակիցները, նախ չլինելով պրոֆեսիոնալ մասնագետներ և չտիրապետելով գործի փաստական և իրավական կողմին կարող են այն համարել ապօրինի և այդ կերպ ճնշել կոնկրետ դատավորին կամ դատավորներին կայացնելու իրենց համոզմունքից բխող դատական ակտ: Նման տրամաբանությամբ առաջնորդվելու պայմաններում՝ երբեք հնարավոր չի լինի ունենալ անկախ, անկաշկանդ և օբյետիվ դատական համակարգ:

Դատական համակարգի անկախ գործունեության ապահովման հիմնական գործառույթներն ըստ էության վերապահված են Բարձրագույն դատական խորհրդին, սակայն Բարձրագույն դատական խորհուրդն այս կարևորագույն հարցի ուղղությամբ կարծես թե որևէ գործունեություն չի իրականացնում և հանդես է գալիս պասիվ դիտորդի դերում:

Եթե մենք ցանկանում ենք ունենալ իրավական պետության կարևորագույն հենասյուն համարվող անկախ, անկողմնակալ և անկաշկանդ գործող դատական համակարգ, պետք է հնարավորինս ձեռնպահ մնանք այս կամ այն գործը հրապարակային քննարկման առարկա դարձնելու միջոցով դատական համակարգի վրա ճնշում գործադրելու դրսևորումներից, իսկ դատական ակտի վերաբերյալ մեր բոլոր դժգոհությունները հնարավորինս պետք է ներառենք մեր հետագա բողոքարկումներում:

Նշվածն, իհարկե, հնարավոր է կյանքի կոչել բացառապես այն դեպքում, երբ Բարձրագույն դատական խորհուրդն ամենայն մանրամասնությամբ ուսումնասիրության կենթարկի դատավորի վարքագծի և գործողությունների վերաբերյալ բոլոր բողոքները և առանց ընկեր, ծանոթ կամ բարեկամ հաշվի առնելու կարգապահական պատասխանատվության հարց կբարձրացնի չարաշահում թույլ տված դատավորի մասով»:

Աղբյուր` Փաստինֆո