Փաստ ինֆո

Այսօր Սասնա ծռերի աջակիցների հերթական ակցիա է տեղի ունեցել Երևան քաղաքի դատարանի Շենգավիթի նստավայրի շենքի մերձակա զբոսայգու տարածքում: Նույն այդ աջակիցներն ավելի վաղ շրջափակել էին Արշակունյաց պողոտան, որտեղ գտնվում է դատարանի հիշյալ նստավայրի շենքը, ինչպես նաև դատարանի մուտքերը:

Հիշեցնենք, որ տարածքն արգելափակելու պատճառով Սասնա ծռեր-ի գործով ամբաստանյալները մնացել էին դատարանում եւ միայն անցած գիշեր իրավապահներին հաջողվել է նրանց դատարանի շենքից տեղափոխել քրեակատարողական հիմնարկներ։

Այսօր ժամը 19-ին աջակիցները  նախաձեռնել էին հանրային քննարկում, որը նպատակ ուներ Սասնա ծռերի գործերով մեղադրվող անձանց հարցը, մասնավորապես, նրանց ազատ արձակելու հարցի լուծման ուղիներ ու մեթոդներ գտնելը: Ի դեպ, հանրային քննարկմանը հրավիրվել էր նաև ՀՀ վարչապետ Նիկոլ Փաշինյանը, սակայն աջակիցների ակնկալիքները չէին արդարացել:

Աջակիցներից մեկը նշեց, որ խափանման միջոցի փոխելու նախաձեռնությունները կապ չունեն Հայաստանում տեղի ունեցած իրադարձությունների հետ, փաստաբանները, ըստ նրա, դա նախաձեռնելու որոշում էին կայացրել մեկ-երկու ամիս առաջ:

Քննարկումների արդյունքների մասին ակտիվիստները դեռեւս չեն մանրամասնել, թեեւ նախաձեռնողներից մեկը՝ Միքայել Մարգարյանը ֆեյսբուքում մտել էր ուղիղ եթեր ու ներկայացնում էր քննարկումը, պատասխանում սոցիալական ցանցի օգտատերերի հարցերին։ 

Ի դեպ, նշենք, որ ուղիղ եթերում օգտատերերից մեկը հարցրել էր, որ «Մարդ է սպանվել՝ ինչպե՞ս կարելի է ազատ արձակել», ինչին  ի պատասխան աջակիցը նշում է՝ հազար ու մի դեպք կա՝ իրավական, օրենքով, որ մարդ են սպանում կարելի է ազատել շատ ու շատ: «Այո, Թեյլերյանը արդարացվել է Թալեաթի սպանության մեջ, այդքանը ձեզ հերիք է, որ դուք հասկանաք՝ կա սպանությանը արդարացում: Ես չեմ ասում, որ այս դեպքն է, բայց դուք հարցնում եք՝ ոնց կարա, ես ձեզ ասում եմ՝ ոնց կարա»:

Աղբյուր` Փաստինֆո