Փաստ ինֆո

Պետք է վերջ տանք այն գործելակերպին, երբ արտոնյալ մարդկանց հանդիպելով ի սկզբանե ելնում ենք այն կանխավարկածից, որ այդ քրեական գործերը պետք է կարճվեն։ Այսօր կառավարության նիստում նման հայտարարությամբ է հանդես եկել ՀՀ վարչապետ Նիկոլ Փաշինյանը։

Վարչապետը նկատեց, որ քաղաքական գործընթացների ժամանակ՝ ապրիլ ամսին արձանագրվել են դեպքեր, երբ հարձակումներ են տեղի ունեցել եւ մարդկանց ավտոմեքենաներ են ջարդվել ինչ-որ անձանց կողմից։ «Ես ակնկալում եմ, որ շատ արագ այդ գործերը քննվեն, այդ հարձակումների հեղինակները պարզվեն, եւ պետք է այս համատեքստում լուծենք տուժած քաղաքացիների խնդիրը, որովհետեւ նրանց ավտոմեքենաները ջարդվել են եւ պետք է հասկանալ թե ինչպես եւ ով է այդ պատախանատվությունը կրելու։ Բացի այդ համապատասխան ընթացակարգով պետք է այդ գործերը բացահայտվեն »,- ասել է վարչապետը։

Կառավարության նիստում նա նաեւ անդրադարձավ Հերացու փողոցում ուսանողների վրա տեղի ունեցած հարձակման դեպքի առթիվ։ « Տեղյակ եք, որ քաղաքական շարժման պրոցեսում ուսանողների վրա հարձակում էր տեղի ունեցել Հերացի փողոցում եւ այդ հարձակման տեսարանը համացանցում լայնորեն տարածվել է։ Պարզվում է, որ գործ է հարուցվել կամ չի հարուցվել եւ արդյունքում կարճվել է։ Կարծում եմ այս գործելակերպին պետք է վերջ տանք, երբ արտոնյալ մարդկանց հանդիպելով ի սկզբանե ելնում ենք այն կանխավարկածից, որ այդ քրեական գործերը պետք է կարճվեն։ Մենք խոսում ենք օրինականության հաստատման մասին։ Պարոն Օսիպյան, եւխոսքս ուղում եմ նաեւ իրավապահ մյուս մարմիններին, մարդիկ պետք է հստակ տեսնեն, որ մենք գնում ենք այդ ճանապարհով այսօր այդպիսի հստակ ուղերձներ ցավոք դեռ չկան եւ ես ակնկալում եմ, որ դրանք կլինեն շատ հստակ»,- հայտարարել է Նիկոլ Փաշինյանը։

Վարչապետը հանձնարարեց, որ գլխավոր դատախազը ստուգի որոշման օրինականությունը։

Աղբյուր` Փաստինֆո