Փաստ ինֆո

Որդուն պաշտպանելու համար վեճին միջամտած հոր սպանության գործով ամբաստանյալ Աշոտ Բաղդասարյանի պաշտպան Երեմ Սարգսյանը դատարանին միջնորդեց իր պաշտպանյալին անմեղ ճանաչել ու արդարացնել դիտավորյալ սպանության մեղադրանքում:

Ըստ պաշտպանի, իր պաշտպանյալին մեղսագրվող արարքը չի կարող որակվել նրան առաջադրված ՀՀ քրեական օրենսգրքի 104-րդ հոդվածի՝ սպանությունը, 1-ին մասով, քանի որ նա այդ արարքը կատարել է անհրաժեշտ պաշտպանության իրավաչափության ներքո:

Երեմ Սարգսյանը նշեց, որ ՀՀ քրեական օրենսգրքի 42-րդ հոդվածով՝ Անհրաժեշտ պաշտպանությունը, ամրագրված վեց պայմաններից հինգը տվյալ դեպքում առկա է: Մասնավորապես, հանցագործություն չի համարվում այն գործողությունը, որը կատարվել է պաշտպանվողի կամ մեկ այլ անձի՝ տվյալ դեպքում իր ու հորաքրոջ որդու, կյանքը, առողջությունը և իրավունքները ոտնձգություն կատարողին վնաս պատճառելու միջոցով պաշտպանելիս: Առկա են նաև հանրորեն վտանգավոր ոտնգության ու ոտնձգության իրական լինելու պայմանները: Հոդվածը նախատեսում է նաև, որ անձի կյանքի համար վտանգավոր բռնության կամ այդպիսի բռնության իրական սպառնալիքով զուգորդված ոտնձգությունից պաշտպանվելիս կարող է պաշտպանվել ցանկացած վնաս, այդ թվում՝ մահ:

Պաշտպանը հայտնեց, որ ըստ գործի տվյալների, իր պաշտպանյալին տուժողի կողմից սուր կտրող գործիքով պատճառվել է 18 թեթև աստիճանի վնասվածքներ՝ մեջքին, ձեռքերին, ոտքերին: Ոտնձգության սկսվելուց հետո ամբաստանյալը զենք է վերցրել, օդ է կրակել, ատրճանակի բռնակով խփել տուժողի գլխին, ապա տեսնելով, որ այլ ելք չկա, կրակել է տուժողի վրա: Այդ պարագայում իր պաշտպանյալը ձեռք է բերել անհրաժեշտ պաշտպանության իրավունք, ասաց Ե.Սարգսյանը:

Երեմ Սարգսյանը միջնորդեց նաև օգտագործման համար անթույլատրելի ճանաչել վկա Արմեն Բաղդասարյանի հեռախոսային խոսակցությունների վերահսկում օպերատիվ-հետախուզական գործողության արդյունքում ձեռք բերված ամփոփագրերը: Ըստ պաշտպանի, օրենսդրությամբ նախատեսված չէ, որպեսզի օպերատիվ-հետախուզական գործողության արդյունքում ձեռք բերված ամփոփագրերն ապացույց ճանաչվեն: Թունավոր ծառի պտղի սկզբունքի համաձայն, անթույլատրելի պետք է ճանաչվի նաև դրանց զննության արձանագրությունը:

Հաջորդ դատական նիստում պաշտպանական ճառով հանդես կգա Աշոտ Բաղդասարյանը:

Հիշեցնենք, որ ավելի վաղ մեղադրող Կարեն Սավթալյանն իր մեղադրական ճառում պնդել է մեղադրանքը և միջնորդել ամբաստանյալին դատապարտել 10-ը տարվա ազատազրկման:

Իսկ տուժողի իրավահաջորդը՝ նրա դուստրը, միջնորդել է ամբաստանյալ Աշոտ Բադդասարյանի նկատմամբ կայացնել արդար դատավճիռ՝ օրենքով սահմանված առավել ու ամենախիստ պատիժ նշանակելով:

Լուսանկարում ՝ փաստաբան  Երեմ Սարգսյանն է:

Աղբյուր` Փաստինֆո