Փաստ ինֆո

«Վերջին մի քանի վարչապետների մեջ ամենավերջինը տարբերվում է նրանով, որ նա հեղափոխությամբ եկավ։ Սակայն այդ ամենը դեռ չի նշանակում, որ հեղափոխությունն անպայման կբերի կոռուպցիայի մակարդակների նվազման»,- այսօր լրագրողների հետ հանդիպման ժամանակ ասաց «Թրանսփարենսի Ինթերնեշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը:

Նրա խոսքով՝ նախորդ վարչակարգի օրոք կոռուպցիայի դեմ պայքարելու քաղաքական կամքը բավարարվել էր միայն օրենքների ընդունմամբ եւ օրենսդրական բազան այնքան էլ վատը չէ։ Սակայն նա կարեւորեց դրանց կիրառումը։ «Քաղաքական կամքի լուրջ դրսեւորում կլինի, ինչպես եղավ Վրաստանում վարդերի հեղափոխությունից հետո՝ 2003 թվականից սկսած，կյանքի կոչումը， կիրարկումը, իրավական պրակտիկայի ստեղծումը։ Այն， ինչը պակասում էր նախկին վարչակարգին»,- ասաց նա: Հայտարարությունների մակարդակով， ըստ Հոկտանյանի， նոր վարչապետը դա գիտակցում է, բայց գնահատականներ տալու համար նախ անհրաժեշտ է ծանոթանալ կառավարության ծրագրին։

«Պետք է տեսնենք՝ ինչպիսին կլինի այդ ծրագիրը: Այնքան օպտիմիստ չենք՝ կապված օրենսդրական լուրջ փոփոխությունների հետ: ՀՀԿ-ն ներկայացրել է լուրջ ֆինանսատնտեսական օլիգարխիկ խմբերի շահերը, և մենք տեսել ենք նաև տարիների ընթացքում քաղաքական և տնտեսական վերնախավերի սերտաճում՝ հենց ՀՀԿ-ի հետ կապված:

Այդ սերտաճումը համակարգային կոռուպցիայի հիմքերից մեկն է: Եթե ուզում ես համակարգային կոռուպցիան հաղթահարել, պետք է այդ սերտաճմանը, քաղաքական-տնտեսական ոլորտների մենաշնորհացմանը վերջ տրվի:

Դրա համար նաև օրենսդրական բարեփոխումներ են պետք, իսկ դրա համար պետք են արտահերթ ընտրություններ: Այսինքն՝ ես չեմ կարծում, որ ՀՀԿ-ն կդադարի լինել այդպիսի խմբավորումների շահերի արտահայտող: Իհարկե, ունենք մենք առնետավազքի բավականին փայլուն տրադիցիաներ, որը տեսել ենք 1998-ի իշխանափոխության ժամանակ, թե ինչպես մեկ օրում «Հանրապետություն» բլոկից 2/3-ը դուրս եկավ և դարձավ Երկրապահ:

Ես նաև վախենում եմ, որ մեր խոշոր տնտեսվարողները, իսկ ավելի կոպիտ ասած՝ օլիգարխները, հանկարծ չդառնան «Քաղաքացիական պայմանագրի» և այլ կուսակցությունների անդամ: Այսինքն՝ եթե մենք ունենում ենք այն իրավիճակը, որը կա, իսկապես արտահերթ ընտրությունները կարևոր են դառնում, ու որքան շուտ, այնքան՝ լավ»:

Վ. Հոկտանյանն ուշադրություն հրավիրեց այն հանգամանքի վրա, որ ԱՄՆ նախագահ Դոնալդ Թրամփը շնորհավորել է Նիկոլ Փաշինյանին, և որպես առաջին մաղթանք՝ նշել է, որ կոռուպցիայի դեմ հաջող պայքար լինի. «Նույնիսկ Ղարաբաղի հակամարտության հարցը երկրորդն է դրվում կոռուպցիայի դեմ պայքարից հետո: Այսինքն՝ սա իսկապես լինել-չլինելու հարց է դառնում»:

Աղբյուր` Փաստինֆո