Փաստ ինֆո

Հայաստանում քաղբանտարկյալներ չկան: Ազգային ժողովում այսօր լրագրողների հետ զրույցում հայտարարեց Գլխավոր դատախազ Արթուր Դավթյանը:

«Վերջին տարիներին բազմաթիվ հեղինակավոր միջազգային կառույցների ներկայացուցիչներ, բազմաթիվ դեսպանատներ, ամենատարբեր իրավապաշտպան կազմակերպություններ իրականացրել են մոնիթորինգ և մինչև այսօր մեզ հայտնի չէ փաստ, որ միջազգային որևէ կառույցի կամ գործընկեր որևէ պետության կողմից Հայաստանում որևէ մեկը ճանաչված լինի քաղաքական բանտարկյալ,- ասաց Գլխավոր դատախազը՝ հավելելով,- ստացվում է այնպես, որ բոլորս մեջբերում ենք համապատասխան միջազգային իրավական փաստաթղթում քաղբանտարկյալի սահմանումը, սակայն երբ հերթը հասնում է մեկնաբանության, ընկնում ենք ծայրահեղությունների մեջ:

Հաճախ հանդիպել եմ մեկնաբանությունների, որոնցից տպավորություն է ձևավորում, թե եթե մեկը զբաղվում է քաղաքական գործունեությամբ, իսկ նրան մի օր մեղսագրվում է հանցագործություն, ուրեմն նա քաղբանտարկյալ է:

Արթուր Դավթյանը նշեց, որ այս կարևոր պահին պետք է ամեն ինչ անել, որպեսզի մեր դատարանների դերը չնվազեցնեն: Դատարանում բաց, հրապարակային հետազոտվում են գործի նյութերը, ինչի ավարտից հետո կլինեն համապատասխան գնահատականներ:

Անդրադառնալով Անդրիաս Ղուկասյանի նկատմամբ խափանման միջոց կալանքը փոխելու որոշմանը՝ Դավթյանն ընդգծեց, որ դա եղել է դատարանի որոշումը, իսկ ինքը որոշմանն ու Ղուկասյանին ազատ արձակելու հիմքերի հետ դեռ չի ծանոթացել:

«Մենք ունեցել ենք հարյուրավոր դեպքեր, երբ դատարանի որոշման հետ համաձայն չենք եղել, բողոքարկել ենք: Այդ բողոքարկումների արդյունքում ունեցել ենք և՛ բավարարումներ, և՛ մերժումներ: Սա դատավարական գործընթաց է, որտեղ որևէ նոր բան չկա»:

Հարցին՝ Վարչապետ Նիկոլ Փաշինյանը հայտարարում է, որ Հայաստանում քաղբանտարկյալներ կան, իսկ գլխավոր դատախազը պնդում է հակառակը, այս հակասությունը չի խոչընդոտելու վարչապետի հետ համատեղ աշխատանքին՝ Արթուր Դավթյանը պատասխանեց, որ ցանկացած պաշտոնյա կարող է իր տեսակետը ներկայացնել, դատախազը իր տեսակետը ներկայացնում է վարույթում առկա նյութերի հիման վրա, ինքը հակասություն չի տեսնում համատեղ աշխատանքի առումով:

Աղբյուր` Փաստինֆո