Փաստ ինֆո

ՀՀ վարչապետ Նիկոլ Փաշինյանի և ՌԴ նախագահ Վլադիմիր Պուտինի՝ Սոչիում կայացած հանդիպումից ինչ-որ խնդիրների լուծում պետք չէ սպասել, քանի որ այն կրում է ծանոթության բնույթ:

«Արմենպրես»-ի մամուլի սրահում հրավիրված ասուլիսում այս մասին նշեց «Մարդկային զարգացման միջազգային կենտրոնի» նախագահ Թևան Պողոսյանը:

«Սոչիում նախատեսված հանդիպմանը մարդիկ փորձելու են ճանաչել միմյանց: Այսինքն՝ ինչ-որ խնդիրների լուծում պետք չէ ակնկալել: Հետագայում արդեն աշխատանքում մեր շահերից ելնելով սեփական քայլերը պետք է առաջ տանել: Աշխարհում հարաբերությունները հիմնված են շահերի վրա: Ցանկացած երկիր փորձում է իր շահերն առաջ տանել: Մենք պետք է սովորենք առաջնորդվել մեր շահերով: Խելոք լինենք, դիվանագետ լինենք, կարողանանք այնպես անել, որ մեր շահերն առաջ տանենք»,-ասաց Թևան Պողոսյանը:

Խոսելով վերջին օրերին Հայաստանից միջազգային հանրությանն ուղարկված ազդակներին և ստացված արձագանքներին՝ Թևան Պողոսյանը նշեց, որ մինչ այսօր դրանք դրական համատեքստում են եղել:

«Ուրախ եմ, որ ունենք իրավիճակ, երբ աշխարհի տարբեր երկրներից ամեն օր ստանում ենք շնորհավորանքներ՝ նշելով, որ պատրաստ են համագործակցել Հայաստանի նոր իշխանությունների հետ: Ուրախ եմ, որ Սփյուռքը նույն ձևով ոգևորված է: Ուրախ եմ, որ Հայաստանը կարող է ներկայանալ որպես մի երկիր, որը մնում է պատասխանատու իր դրած ստորագրության համար: Ցանկացած միջազգային պարտավորության կատարումը և պահանջելը, որ դիմացինն էլ կատարի, միայն ու միայն խոսում է այն մասին, որ այն կանխատեսելի, ժողովրդավար երկիր է»,-հավելեց նա:

Սոչիում կայացել է ՀՀ վարչապետ Նիկոլ Փաշինյանի և ՌԴ նախագահ Վլադիմիր Պուտինի առաջին հանդիպումը: Քննարկման առանցքում երկկողմ հետաքրքրություն ներկայացնող թեմաներն են։ Հանդիպումն անցկացվել է Եվրասիական տնտեսական միության բարձրագույն խորհրդի նիստից առաջ։ Հայկական կողմից հանդիպմանը մասնակցել են փոխվարչապետ Տիգրան Ավինյանը, ԱԳ նախարար Զոհրաբ Մնացականյանը, ՌԴ-ում Հայաստանի դեսպան Վարդան Տողանյանը, վարչապետի օգնականներ Վարուժան Ներսեսյանը, Ռուբեն Ռուբինյանը և ԱԳՆ խորհրդական, ԱՊՀ վարչության պետ Արմեն Ղևոնդյանը։

Ռուսական կողմից հանդիպմանը մասնակցել են ՌԴ նախագահի աշխատակազմի ղեկավարի տեղակալ, մամուլի քարտուղար Դմիտրի Պեսկովը, ՌԴ նախագահի օգնական Յուրի Ուշակովը, ՌԴ տնտեսական զարգացման նախարար Մաքսիմ Օրեշկինը, ՌԴ ֆինանսների նախարար Անտոն Սիլուանովը, ՌԴ տրանսպորտի նախարար Մաքսիմ Սոկոլովը, ՌԴ արտաքին գործերի նախարարի տեղակալ Ալեքսանդր Պանկինը։

Աղբյուր` Փաստինֆո