Փաստ ինֆո

2015 թ. հունվարի 29 -ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով հաջորդ դատական նիստում ցուցմունք կտան ամբաստանյալները:

Իսկ մինչ այդ այսօր Երևան քաղաքի ընդհանուր իրավասության դատարանում՝ դատավոր Դավիթ Հարությունյանի նախագահությամբ, գործով հերթական դատական նիստին ամբաստանյալներ Գնել Թևոսյանը, Վաչե Սահակյանը, Մովսես Ազարյանը, Վարազդատ Սաֆարյան հայտնեցին, որ ցանկանում են ցուցմունք տալ, սակայն դատարանին խնդրեցին իրենց ժամանակ տրամադրել որպեսզի նախապատրաստվեն:

Ամբաստանյալ Նորիկ Սահակյանն էլ ասաց՝ պաշտպանի հետ կխորհրդակցի և կորոշի ցուցմունք տալիս է, թե՝ ոչ: Ամբաստանյալը իր որոշման մասին կհայտնի հաջորդ դատական նիստում:
Ամբաստանյալների այս հայտարարությունը տուժողի իրավահաջորդի դժգոհությունն առաջացրեց այն պատճառով, որ դատական նիստը հետաձգվելու է:

Սպանված Հայկազ Բարսեղյանի հայրը՝ Արկադի Բարսեղյանը, հայտարարեց, որ տևական ժամանակ է՝ դատական նիստեր չեն կայացել և վերջին նիստի ժամանակ ամբաստանյալները տեղեկացվել են, որ առաջիկայում իրենց հարցաքննությունն է նախատեսվում, ուստի կարող էին նախապատրաստված լինեին այսօր ցուցմունք տալուն:

«Ամեն ինչ չափ ու սահման ունի, ամեն անգամ ինչ-որ պատճառաբանություններ են բերում և նիստը հետաձգվում է»,- ասաց տուժողի իրավահաջորդը:

Նախագահող դատավոր Դավիթ Հարությունյանն արձանագրեց՝ տուժող կողմի դիտարկումները տեղին են և որ պաշտպանական կողմն անբարեխիղճ է օգտվում իր իրավունքներից:

Նշենք նաև, որ այսօր մեղադրողը միջնորդեց հրապարակել գործով երկու վկայի՝ Սամվել Սերոբյանի և Արթուր Վահանյանի նախաքննական ցուցմունքները: Վկաները Հայաստանից բացակայում են, ուստի՝ մեղադրողը հայտարարեց, որ վկաների՝ դատարան հրավիրելու և հարցաքննելու բոլոր միջոցները սպառվել են:

Միջնորդությանն առարկեց պաշտպանական կողմը: Գնել Թևոսյանի պաշտպան Արա Զաքարյանը նշելց, որ նախաքննության ընթացքում վկա Սամվել Սերոբյանի և իր պաշտպանյալ Գնել Թևոսյանի միջև թեև առերեսում քննական գործողություն կատարվել է, սակայն դա լիարժեք կերպով չի ապահովում պաշտպանական կողմի իրավունքը, իսկ մյուս վկայի հետ առերեսում չի կատարվել:

Ամբաստանյալ Մովսես Ազարյանն էլ հայտարարեց, որ վկա Սերոբյանի հետ առերեսում չի եղել, քանի որ մտածել է դատարանում հնարավորություն կունենա նրան հարցեր ուղղելու:

Մովսես Ազարյանի պաշտպան Անահիտ Հովհաննիսյանն էլ նշեց՝ առերեսում քննչական գործողությունը պատշաճ պայմաններում չի կատարվել, և իրենք հրաժարվել են՝ միջնորդելով որպեսզի «Նուբարաշեն» ՔԿՀ-ում լինի, ոչ թե՝ քննիչի աշխատասենյակում, ինչը մերժվել է:

Դատարանը հետաձգեց միջնորդության քննարկումը՝ նշելով, որ առաջիկայում դեռ դատավարական այլ գործողություններ կան անելու, հնարավոր է, որ վկաները վերադառնան Հայաստան և նրանց հարցաքննեն:

Հաջորդ դատական նիստը տեղի կունենա մայիսի 21-ին:

Աղբյուր` Փաստինֆո