Փաստ ինֆո

«Ճվճվ Արոյի» որդու՝ Սերժ Վարդանյանի վերաբերյալ կողոպուտի ու մի խումբ անձանց կամ կազմակերպված խմբի կողմից խուլիգանության գործով այսօրվա դատական նիստում դատաքննությունը չսկսվեց:

Դատարանը ճշտեց ամբաստանյալների՝ Սերժ Վարդանյանի ու մի խումբ անձանց կամ կազմակերպված խմբի կողմից խուլիգանության մեջ մեղադրվող Գևորգ Խաչատրյանի ու Սամվել Քրմոյանի անձնական տվյալները:

Մասնավորապես, Սերժ Վարդանյանը ի պատասխան դատարանի հարցի՝ հայտնեց, որ նախկինում դատված է եղել, նախ ասաց, որ չի հիշում, թե ինչի համար է դատապարտվել, ապա քիչ անց հայտարարեց՝ «եթե չեմ սխալվում, պետական գույքը վնասելու» համար ու դատապարտվել է երեք ամսվա ազատազրկման:

Իր՝ Սերժ Վարդանյանի, մեկ օր հետախուզման մեջ լինելու մասին դատարանի ճշտող հարցին ամբաստանյալը պատասխանեց, որ ինքը տեղյակ չի եղել հետախուզման մեջ գտնվելու մասին:

Ամբաստանյալ Գևորգ Խաչատրյանը՝ պատասխանելով դատարանի՝ ձերբակալված եղե՞լ եք հարցին, պատասխանեց, որ մեկ տարի երկու ամիս եղել է կալանքի տակ: Սակայն քիչ անց պարզվեց, որ խոսքն այլ գործի մասին է, որով նա երկրորդ դատաքննության արդյունքում արդարացվել է ՀՀ քրեական օրենսգրքի 258-րդ հոդվածի 4-րդ մասով՝ զենքի կամ որպես զենք օգտագործվող առարկաների գործադրմամբ խուլիգանության մեղադրանքում ու անմեղ ճանաչվել:

Գևորգ Խաչատրյանը հաստատեց, որ ներկա գործով ինքը ձերբակալված չի եղել:

Դատական նիստում Գևորգ Խաչատրյանը հայտնեց, որ ինքը չի ստացել մեղադրական եզրակացության պատճենը, ի պատասխան մեղադրողը նշեց, որ ինքը ուղարկել է մեղադրական եզրակացության պատճենը ամբաստանյալին, սակայն այն վերադարձել է՝ «չպահանջված» մակագրությամբ: Մեղադրողը հենց դատական նիստերի դահլիճում փոխանցեց մեղադրական եզրակացության պատճենն ամբաստանյալին:

Դատարանը՝ հաշվի առնելով, որ ամբաստանյալը ծանոթ չէ մեղադրական եզրակացությանը, ուստի անհրաժեշտ է, որ նա կարողանա ծանոթանալ մեղադրական եզրակացությանը, ինչպես նաև հաշվի առնելով, որ գործում չկան տվյալներ նրա արդարացված լինելու մասին, ինչը ճշտելու կարիք կա, որոշեց հետաձգել դատական նիստը:

Ըստ Սերժ Վարդանյանին առաջադրված մեղադրանքի, նա 2017թ․ սեպտեմբերի 12-ին Երևան քաղաքի Հր․ Քոչար փողոցի 44/2 հասցեի դիմաց կայանած Կարեն Գասպարյանի կողմից շահագործվող «Օպել Աստրա» մակնիշի ավտոմեքենայի սրահում Կարեն Գասպարյանի պարանոցից քաշել-պոկելու եղանակով հափշտակել է զգալի չափերի՝ 148 000 ՀՀ դրամ արժողությամբ ոսկյա շղթան։

Ըստ մեղադրական եզրակացության, 2017թ․ նոյեմբերի 26-ին «Աֆրիկյանների» ռեստորանային համալիրում՝ առանձնասենյակում, Գևորգ Խաչատրյանը ընկերների՝ Սերժ Վարդանյանի, Սամվել Քրմոյանի և ոմն Վալոդի հետ, բարձրաձայն տվել են սեռական բնույթի հայհոյանքներ, որի պատճառով նույն ռեստորանային համալիրից հաճախորդները հեռացել են, այնուհետև վիճաբանության մեջ են մտել մատուցողի հետ, որի ընթացքում Սամվել Քրմոյանը բռունցքներով հարվածել է մատուցողի ձախ աչքի շրջանին և նրան պատճառել թեթև վնասի հատկանիշներ չպարունակող մարմնական վնասվածք։

Աղբյուր` Փաստինֆո