Փաստ ինֆո

«ԻԳԼԱ» տեսակի դյուրակիր զենիթահրթիռային համալիրի ռազմամթերք հանդիսացող հրթիռն ապօրինի իրացնելու մեջ մեղադրվող Ռոբերտ Աղվանյանի վերաբերյալ գործով նախաքննությունն ավարտվել է և գործն արդեն դատարանում է:

Հայտնի է նաև, որ գործը կքննվի Արմավիրի մարզի ընդհանուր իրավասության դատարանում՝ դատավոր Արթուր Ադամյանի նախագահությամբ:

Ավելի վաղ «Փաստինֆո»-ն տեղեկացրել էր, որ Աղվանյանը հետախուզման մեջ էր գտնվում և 2017 թվականի դեկտեմբերի 25-ին Վրաստանից տեղափոխվել է Հայաստան: Նրա վերաբերյալ քրեական գործը քննվել է Ազգային անվտանգության ծառայությունում:

Ըստ մեղադրանքի՝ Ռոբերտ Աղվանյանը 2011թ. ընթացում հանգուցյալ հոր տունը վաճառելիս խորդանոցում գտել է ապօրինի կերպով պահված վերոհիշյալ ռազմամթերքը, այն փաթեթավորել է պոլիէթիլենային թաղանթի մեջ, ապա ապօրինի փոխադրել է և գաղտնի պահել է ընկերոջ` Արթուր Վարդանյանի կնոջ մորը պատկանող ՀՀ Արմավիրի մարզի Հայթաղ գյուղում գտնվող տան նկուղում:

2017թ. փետրվարի 22-ին Ռոբերտ Աղվանյանը Վրաստանի Թբիլիսի քաղաքում հանդիպել է իր վաղեմի ծանոթներին` Վաղարշապատ քաղաքի բնակիչներ Արմեն Պողոսյանին և Հրաչյա Մայիլյանին, ովքեր Սանասար Գաբրիելյանի հետ նախնական համաձայնությամբ, Սամվել Բաբայանի դրդմամբ վերջինիս կողմից խոստացված 50.000 ԱՄՆ դոլար վարձատրությունը ստանալու ակնկալիքով Վրաստանի տարածքում փնտրել են «Իգլա» տեսակի դյուրակիր զենիթահրթիռային համալիր: Զրույցների ընթացքում Հրաչյա Մայիլյանից և Արմեն Պողոսյանից տեղեկանալով նշված ռազմամթերքը ձեռք բերելու մտադրության մասին, Ռոբերտ Աղվանյանը պատրաստակամություն է հայտնել 38.000 ԱՄՆ դոլարի դիմաց իրացնել այդ ռազմամթերքը:

Այնուհետև վերադառնալով Հայաստան Ռոբերտ Աղվանյանը 2017թ. մարտի 15-ին ապահովել է ապօրինի պահված ռազմամթերքի փոխադրումը ՀՀ Արմավիրի մարզի Հայթաղ գյուղի ամայի տարածք, որտեղ հնարավորություն է ընձեռել Հրաչյա Մայիլյանին պլանշետային համակարգիչով նկարահանել այն` պատվիրատուին ցույց տալու համար, իսկ 2017թ. մարտի 17-ին 4000 ԱՄՆ դոլար կանխավճարի դիմաց նույն գյուղում «Իգլա» տեսակի դյուրակիր զենիթահրթիռային համալիրի արձակման խողովակով 03277 գործարանային համարով, «9Մ39» տիպի ռազմամթերք հանդիսացող հրթիռը փոխանցել է Հրաչյա Մայիլյանին` ապօրինի կերպով իրացնելով այն:

Ռոբերտ Աղվանյանին մեղադրանք է առաջադրվել ՀՀ քրեական օրենսգրքի 235-րդ հոդվածի 1-ին մասով:

Աղվանյանը կալանքի տակ է:

Հիշեցնենք նաև, որ Ռոբերտ Աղվանյանը ԼՂՀ պաշտպանության բանակի նախկին հրամանատար Սամվել Բաբայանի և մյուսների գործով վերաքննիչ դատարանում ցույցմունք տալիս հայտնել էր, որ Մայիլյանը ցանկացել է ձեռք բերել այն և հարցրել է, թե որտեղ է գտնվում, ինքն էլ ասել է՝ Վրաստանում և արժի 25 .000 դոլար:

Զենիթահրթիռային համալիրի համար Մայիլյանն իրեն վճարել է 4000 ԱՄՆ դոլար, իսկ մնացած գումարը խոստացել է վճարել հետագայում, սակայն գումարի մյուս մասն այդպես էլ իրեն չեն վճարել. Մայիլյանը զանգահարել է և հայտնել, որ հրաժարվել է «Իգլան» ձեռք բերելուց:

Նա նաև նշել էր, որ զենիթահրթիռային համալիրից իրենց տանը եղել է 2 հատ, երկրորդն այս գործով նախաքննության ժամանակ, երբ հասկացել է, թե ինչ է տեղի ունենում ապրիլին նվիրաբերել է բանակին: Նա հստակ չնշեց 2016, թե 2017 թվականի ապրիլին:

Աղվանյանը նաև դատարանում հայտարարել էր, ինքը որևէ մեկի դեմ ցուցմունք չի տվել, իր դեմ են ցուցմունք տվել, ինչից հետո հետախուզում են հայտարարել ու Վրաստանից բերել են Հայաստան, ինչ պատիժ էլ դատարանն իր նկատմամաբ սահմանի, ինքը պատրաստ է կրել, և որ իրողությունն է պատմում, ոչ ավել է ասում, ոչ՝ պակաս, ոչ մեկից էլ չի վախենում:

Ինչ վերաբերում է «Իգլային», ապա Աղվանյանի խոսքով՝ իրեն ասել են, թե Հայաստանից դուրս պետք է տանեն զենքը, դրա համար է ինքը վաճառել է մտածելով, որ «կարող էր քրդերին պետք գալ՝ թուրքերի հերն անիծելու համար»:

Աղբյուր` Փաստինֆո