Փաստ ինֆո

Տավուշի մարզի Դիլիջան քաղաքում կիրականացվի ներդրումային ծրագիր, որի շրջանակում կստեղծվի առողջարանային կենտրոն եւ կզարգացվեն հասարակական ենթակառուցվածքները: Ներդրումային ծրագիրը հավանության արժանացավ մայիսի 11-ին կայացած ՀՀ կառավարության նիստում, որը վարում էր ՀՀ վարչապետ Նիկոլ Փաշինյանը:

Ներկայացնելով հարցը՝ Տարածքային կառավարման եւ զարգացման նախարարիժամանակավոր պաշտոնակատար Վաչե Տերտերյանը նշեց, որ ներդրումային փաթեթը բաղկացած է 4 ծրագրից:

«Առաջինն առողջարանային հակատարիքային վերականգնողական բժշկական ծառայություններ իրականացնող բարձրակարգ ինտեգրված կենտրոնի ստեղծումն է՝ «Չաում Դիլիջան» բրենդի ներքո: Այս կենտրոնն Հայաստանում, նաեւ տարածաշրջանում կլինի եզակի իր տեսակի մեջ: Դրա տարածքը 3-5 հա է գնահատվում: Երկրորդ ծրագիրը քաղաքային լճի հարակից տարածքի բարեկարգումն է, ամբողջ այդ տարածքում կձևավորվի տուրիստական հանգստի և համայնքային կյանքի զարգացման հանգույց: Երրորդը քաղաքային զբոսայգու ամբողջական բարեկարգումն է, չորրորդը քաղաքային մարզադաշտի բարեկարգումն է, ինչի արդյունքում կունենանք ժամանակակից մարզադաշտ, ինչն էլ ենթադրում է, որ կանցկացվեն տարածաշրջանային, հանրապետական և այլ միջոցառումներ»,- «Արմենպրես»-ի հաղորդմամբ, ասաց Վաչե Տերտերյանը:

Ծրագրի գնահատված արժեքը կազմում է մոտ 15,6 մլրդ դրամ, իսկ ծրագրի իրականացման տեւողությունը 60 ամիս է: Նրա խոսքով՝ ժամկետների համար նշվել է 60 ամիս, որովհետեւ ներդրողների հետ քննարկումները ցույց տվեցին, որ այս պահին ավելի կոնկրետ ժամանակացույց ի վիճակի չեն ներկայացնել:

Վարչապետ Նիկոլ Փաշինյանը հետաքրքրվեց, թե այս ծրագրի շրջանակում քաղաքային զբոսայգու հողի կարգավիճակի փոփոխություն, արդյոք, տեղի ունենալո՞ւ է: Ի պատասխան հարցին՝ Վաչե Տերտերյանը նշեց, որ քաղաքային զբոսայգու հողի կարգավիճակի փոփոխություն չի լինի, իսկ մասնավոր կենտրոնի շենքը կառուցելու համար նման փոփոխություն նախատեսված է:

Աղբյուր` Փաստինֆո