Փաստ ինֆո

Ավտոմեքենա կայանելու հարցի շուրջ վիճաբանության գործով այսօրվա դատական նիստում սկսվեց դատաքննությունը:

Ըստ մեղադրանքի, ամբաստանյալ Բաբկեն Կարապետյանը երկու անձի՝ եղբայրներ Պողոսյանների առողջությանը դանակով հարվածելու միջոցով պատճառել է կյանքի համար վտանգավոր ծանր վնաս: Մասնավորապես, ամբաստանյալն, ըստ մեղադրական եզրակացության, մի եղբորը դանակով հարված է հասցրել որովայնին, իսկ մյուսին՝ մեջքին: Մի եղբոր պարագայում հարվածն որովայնի աջից թափանցել է կրծքավանդակի խոռոչ, իսկ կրծքավանդակի ձախ կեսից պատճառվել է չթափանցող վնասվածք, մյուս եղբոր պարագայում մեջքի կողմից հարվածը թափանցել է կրծքավանդակի խոռոչ, առաջացրել պնևմաթորաքս:

Ամբաստանյալը հայտարարեց, որ իրեն մեղավոր չի ճանաչում և որ ինքը պաշտպանվել է:

Դատարանում գործի ապացույցների հետազոտումը սկսվեց գրավոր ապացույցների հետազոտումից: Մասնավորապես, հրապարակվեց տուժողների դատաբժշկական փորձաքննության եզրակացությունը:

Ամբաստանյալի պաշտպան Գարիկ Մալխասյանը դատարանի ուշադրությունը հրավիրեց այն հանգամանքի վրա, որ տուժողների մարմիններին բացի կտրող-ծակող գործիքով պատճառված վնասվածքներից, այլ վնասվածքներ չեն հայտնաբերվել:

Հետազոտվեց նաև ամբաստանյալի դատաբժշկական փորձաքննության եզրակացությունն, ըստ որի Բ.Կարապետյանի դեմքին, կրծքավանդակին հայտնաբերվել են վնասվածքներ՝ սալջարդեր, արյունազեղումներ, քերծվածքներ, որոնք պատճառվել են ոտքերով, բռունցքներով ու առողջությանը պատճառել թեթև վնաս՝ առողջության կարճատև քայքայումով:

Աղբյուր` Փաստինֆո