Փաստ ինֆո

«Դոն Պիպո»-ի, նույն ինքը՝ Արթուր Ասատրյանի սպանության նախապատրաստության գործով նախաքննական մարմինը մինչև վերջին պահը կատարել է հնարավոր բոլոր գործողությունները խոչընդոտելու համար սույն քրեական գործով բազմակողմանի, լրիվ և օբյեկտիվ քննությանը: Այս մասին «Փաստինֆո»-ի հետ զրույցում հայտարարեց Զոհրաբ Ղումաշյանի պաշտպան, փաստաբան Վահան Հովհաննիսյանը:

Պաշտպանը նշեց, որ նախաքննության ընթացքում պաշտպանները կաշկանդված են եղել նախաքննական գաղտնիքը չհրապարակելու պարտականությամբ, որի կապակցությամբ էլ հնարավոր չի եղել բավարար չափով տեղեկատվություն տրամադրել, սակայն այժմ արդեն իսկ ավարտվել է գործով նախաքննությունը:

Վահան Հովհաննիսյանը նշեց, որ քսան հատորանոց (յուրաքանչյուր հատորը մոտ 250 թերթ) կազմող գործի յուրաքանչյուր հատորին ծանոթանալու համար տրամադրվել է շուրջ 2,5 ժամ ժամանակ, իսկ յուրաքանչյուր էջին՝ 0,672 րոպե: «Սա այն դեպքում երբ ես պետք է ընդհանրապես չհանգստանամ, չճաշեմ և այլն»,- ասաց Վ.Հովհաննիսյանը:

Բացի այդ, գործին կից տրամադրվել են մոտ քառասուն լազերային սկավառակներ, որոնցից յուրաքանչյուրի վրա առկա է մինչև 17 ժամ ձայնագրություն:

«Ողջ վերոգրյալից պաշտպանական կողմը հանգում է նաև այն տրամաբանական եզրահանգման, որ տրամադրելով ոչ ողջամիտ և ռեալ ժամկետներ նախաքննական մարմինը նպատակ է հետապնդում զրկել պաշտպանական կողմին քրեական գործի նյութերին լիարժեք ծանոթանալու, քննության տվյալ փուլում անհրաժեշտ և պարտադիր միջնորդություններ կատարելու իրավունքից ու հնարավորությունից»,- ասաց Վ.Հովհաննիսյանը՝ հաշվի առնելով, որ միջնորդություններ կարող են ներկայացվել միայն գործի լիարժեք ուսումնասիրությունից հետո և միայն քննության այս փուլում, քանի որ դատարանում դրանք անելը հնարավոր չի լինելու:

Այսպիսով, ըստ պաշտպանի, ստեղծվել է մի այնպիսի իրավիճակ, երբ պաշտպանական կողմն օբյեկտիվորեն զրկված է գործի նյութերի ծանոթացման արդյունքում նախաքննական մարմնին միջնորդություններ ներկայացնելու հնարավորությունից:

Պաշտպանի կարծիքով, «այս ամենի նպատակը չակերտավոր տուժողներին /Դոն Պիպո և այլն/ պաշտպանելն է, քանի որ նրանք միայն անունով են տուժող, իսկ իրականում քրեական գործով ամբաստանյալների նկատմամբ իրականացրել են ֆիզիկական, հոգեկան ճնշումներ, տևական ժամանակ զրկել ազատությունից, որի վերաբերյալ լրացուցիչ կհայտնեմ»:

Գործով այլ՝ աննախադեպ խախտումներին, պաշտպանը խոստացավ անդրադառնալ հետագայում:

Լուսանկարում՝ Արթուր Ասատրյանը

Աղբյուր` Փաստինֆո