Փաստ ինֆո

«Ճվճվ Արոյի» որդու՝ Սերժ Վարդանյանի և ևս երկու անձի վերաբերյալ գործը դատարանում է, այն մակագրվել է Երևան քաղաքի ընդհանուր իրավասության դատարանի դատավոր Վարդան Աբրահամյանին:

Ավելի վաղ տեղեկացրել էինք, որ, ըստ մեղադրանքի, Սերժ Վարդանյանը 2017թ. սեպտեմբերի 12-ին՝ ժամը 03-ի սահմաններում, Երևան քաղաքի Հր. Քոչարի փողոցի կամրջի հարևանությամբ կայանված «Օպել Աստրա» մակնիշի ավտոմեքենայի սրահում պոկել և հափշտակել է իր ծանոթի պարանոցի՝ զգալի չափերի արժողության ոսկյա վզնոցը, ապա՝ նրա հետ միասին գնացել գրավատուն:

Քաղաքացու հայտարարության համաձայն՝ Ս.Վարդանյանը խոստացել էր վերադարձնել վզնոցը, սակայն չի վերադարձրել, ուստի՝ դեպքից օրեր անց դիմել է իրավապահներին։

Այս դեպքից ամիսներ անց Սերժ Վարդանյանը կրկին հայտնվում է իրավապահների տեսադաշտում. այս անգամ ընկերների հետ գտնվելով «Աֆրիկյաններ» ռեստորանային համալիր, հասարակական կարգը կոպիտ կերպով խախտելով, բացահայտ անհարգալից վերաբերմունք է դրսևորելով այդ պահին ռեստորանում գտնվող հաճախորդների և աշխատակիցների նկատմամբ, վիճաբանել, հայհոյանքներ է հնչեցրել իրեն և ընկերներին դիտողություն կատարած նշված ռեստորանային համալիրի մատուցողի հասցեին, ապա՝ միջանցքում բռնություն է գործադրել վերջինիս նկատմամբ։

Խուլիգանության դեպքով, բացի Սերժ Վարդանյանից, մեղադրանք է առաջադրվել նրան երկու ընկերներին:

Ըստ Գևորգ Խաչատրյանին և Սամվել Քրմոյանին առաջադրված մեղադրանքի՝ 2017թ․ նոյեմբերի 26-ին գտնվելով «Աֆրիկյաններ» ռեստորանային համալիրում՝ ընկերների Սերժ Վարդանյանի և ոմն Վալոդի հետ, բարձրաձայն տվել են սեռական բնույթի հայհոյանքներ, որի պատճառով նույն ռեստորանային համալիրից հաճախորդները հեռացել են, այնուհետև վիճաբանության մեջ են մտել մատուցող Հովհաննես Գասպարյանի հետ, որի ընթացքում Սամվել Քրմոյանը բռունցքներով հարվածել է Հովհաննես Գասպարյանի ձախ աչքի շրջանին և նրան պատճառել թեթև վնասի հատկանիշներ չպարունակող մարմնական վնասվածք։

Սերժ Վարդանյանի նկատմամբ որպես խափանման միջոց է ընտրվել կալանավորումը, իսկ Գևորգ Խաչատրյանի և Սամվել Քրմոյանի նկատմամբ՝չհեռանալու մասին ստորագրությունը:

Աղբյուր` Փաստինֆո