Փաստ ինֆո

Փոքրամասնության կառավարության պայմաններում կողմերի միջև համագոյակցություն որոշ ժամանակահատվածում և որոշ արդյունավետությամբ հնարավոր է, մնացածը բոլոր կողմերի քաղաքական կամքի տիրույթում է: «Արմենպրես»-ի փոխանցմամբ՝ լրագրողների հետ հանդիպմանը նման տեսակետ արտահայտեց ՀՀ պաշտպանության նախարարի պաշտոնակատար Վիգեն Սարգսյանը՝ պատասխանելով հարցին, թե արդյոք վտանգներ տեսնում է այն պարագայում, երբ ձևավորվի փոքրամասնության կառավարություն, իսկ խորհրդարանական մեծամասնությունը դառնա ընդդիմադիր ուժ:

Անդրադառնալով պատասխանատվությունը հավասարապես կիսելու դիտարկմանը՝ Վիգեն Սարգսյանն ասաց, որ դա հնարավոր է այն դեպքում, երբ կա որոշում կայացնելու լիազորություն, առանց լիազորության՝ պատասխանատվություն չի լինում:

«Շատ հստակ պետք է տարանջատել պատասխանատվության այն հատվածը, որը ենթադրում է խորհրդարանական մեծամասնության քվեարկություն այն մասից, որը ենթադրվում է գործադիր իշխանության ամենօրյա կառավարման ուղղություն»,-ասաց Վիգեն Սարգսյանը:

Պաշտոնյայի խոսքով՝ ՀՀԿ խմբակցության ղեկավար Վահրամ Բաղդասարյանի՝ երեկվա ԱԺ ելույթը տալիս է մի շարք հարցերի պատասխաններ: «Հստակ արձանագրվեց, որ ՀՀԿ-ն չի պատրաստվում խոչընդոտել տրամաբանական, նույնիսկ մեր քաղաքական հայացքներից տարբերվող քաղաքական լուծումների հարցերում: Հստակ նշվել է այն հարցերի շարքը, որտեղ մենք պահանջելու ենք հաշվետվողականություն և եղած կուրսի պահպանում: Մնացածը քաղաքական գործընթաց է»,-ավելացրեց Վիգեն Սարգսյանը:

Աղբյուր` Փաստինֆո