Փաստ ինֆո

Քիչ առաջ ՀՀ վարչապետ ընտրվեց ԱԺ «Ելք» խմբակցության ղեկավար Նիկոլ Փաշինյանը: ՀՀ վարչապետի միակ թեկնածուի օգտին քվեարկեց 59 և այդ թեկնածության դեմ՝ 42 պատգամավոր:

Հիշեցնենք, որ վարչապետի ընտրության առաջին փուլում, որը տեղի է ունեցել մայիսի 1-ին, Նիկոլ Փաշինյանը չէր ստացել բավարար թվով ձայներ (45 դեմ և 56 կողմ): Ընտրվելու համար Ն.Փաշինյանին անհրաժեշտ էր առնվազն 53 ձայն:

Երկրորդ փուլում Ն.Փաշինյանն առաջադրվել է պատգամավորների թվի 1/3-ից ավելի պատգամավորի ստորագրությամբ:

Մայիսի մեկի ընտրություններից հետո ՀՀԿ խմբակցության ղեկավար Վահրամ Բաղդասարյանը՝ խմբակցության անունից, հայտարարել էր, որ խմբակցությունը ՀՀ վարչապետի երկրորդ փուլում կպաշտպանի պատգամավորների մեկ երրորդի (35 պատգամավոր) կողմից առաջադրված թեկնածուին, և այդ օրը Հայաստանը կունենա վարչապետ:

Իսկ նախօրեին ՀՀԿ ԳՄ նիստից հետո ՀՀԿ խոսնակ Էդուարդ Շարմազանովը վերահաստատել էր, որ Հանրապետական կուսակցությունը համապատասխան քանակությամբ ձայն կապահովի վարչապետի ընտրության համար:

«Մենք՝ որպես կուսակցություն, մնում ենք մեր սկզբունքային կարծիքին և, միևնույն ժամանակ, մենք օժանդակելու ենք պատգամավորների 1/3-րդի ստորագրությամբ առաջադրված վարչապետի թեկնածուին, տվյալ դեպքում՝ Նիկոլ Փաշինյանին: Եթե չեմ սխալվում, Փաշինյանի օգտին հավաքվել է 45 ստորագրություն, և Հայաստանի Հանրապետական կուսակցությունը համապատասխան քանակությամբ ձայնով կապահովի, որպեսզի ունենանք վարչապետ: Այդ ամենը եղել է խմբակցության որոշմամբ, մենք ենք պատգամավորներին հորդորել, որ նրանք կողմ քվեարկեն: Այստեղ որևէ կուսակցության բաժանում չկա, սա մեր կուսակցության որոշումն է»,- ասել էր Է.Շարմազանովը:

Աղբյուր` Փաստինֆո