Փաստ ինֆո

Հանրապետական կուսակցությունը համապատասխան քանակությամբ ձայն կապահովի վարչապետի ընտրության համար: ՀՀԿ ԳՄ նիստից հետո լրագրողների հետ զրույցում այս մասին հայտարարել է ՀՀԿ խոսնակ Էդուարդ Շարմազանովը:

«Մենք՝ որպես կուսակցություն, մնում ենք մեր սկզբունքային կարծիքին և, միևնույն ժամանակ, մենք օժանդակելու ենք պատգամավորների 1/3-րդի ստորագրությամբ առաջադրված վարչապետի թեկնածուին, տվյալ դեպքում՝ Նիկոլ Փաշինյանին: Եթե չեմ սխալվում, Փաշինյանի օգտին հավաքվել է 45 ստորագրություն, և Հայաստանի Հանրապետական կուսակցությունը համապատասխան քանակությամբ ձայնով կապահովի, որպեսզի ունենանք վարչապետ: Այդ ամենը եղել է խմբակցության որոշմամբ, մենք ենք պատգամավորներին հորդորել, որ նրանք կողմ քվեարկեն: Այստեղ որևէ կուսակցության բաժանում չկա, սա մեր կուսակցության որոշումն է»,- ասել է Է.Շարմազանովը:

Ո՞ւմ են հորդորել կողմ քվեարկել հարցին Է.Շարմազանովը պատասխանել է՝ վաղը կիմանաք:

Այսօր ՀՀԿ գործադիր մարմնի անդամները քննարկել են վաղը՝ մայիսի 8-ին, կայանալիք վարչապետի ընտրության երկրորդ փուլի հետ կապված հարցեր: ՀՀ վարչապետի միակ թեկնածուն «Ելք» խմբակցության պատգամավոր Նիկոլ Փաշինյանն է:

Հիշեցնենք, որ վարչապետի ընտրության առաջին փուլում, վարչապետի պաշտոնում առաջադրված միակ թեկնածուն՝ «Ելք» խմբակցության պատգամավոր Նիկոլ Փաշինյանն ընտրվելու համար չէր ստացել բավարար թվով ձայներ:

Ավելի ուշ իշխող՝ ՀՀԿ-ն հայտարարել էր, որ վարչապետի ընտրության երկրորդ փուլում կպաշտպանի պատգամավորների մեկ երրորդի (35 պատգամավոր) կողմից առաջադրված թեկնածուին, և այդ օրը Հայաստանի Հանրապետությունը կունենա վարչապետ:

Աղբյուր` Փաստինֆո