Փաստ ինֆո

Ավարտվել է ձերբակալվածներին խոշտանգումների ենթարկելու ու շորթման մեջ մեղադրվող վեց ոստիկանների վերաբերյալ քրեական գործի նախաքննությունը, հաղորդում է ՌԴ քննչական կոմիտեն:

«Քննության տվյալներով, 2010-2016թթ. հանրապետական ՆԳՆ աշխատակիցները ֆիզիկական բռնության գործադրմամբ, այդ թվում՝ էլեկտրական հոսանքի օգտագործմամբ, ստիպել են ձերբակալվածներին խոստովանել, որ նրանք պահել են հրազեն, կատարել ոստիկանների կյանքի հանդեպ ոտնձգություն, ավազակային հարձակումներ և այլ հանցագործություններ», ըստ Ինտերֆաքսի, ասվում է հաղորդագրության մեջ:

Տուժածներից մեկը խեղդամահ է եղել, մի քանի մարդ լուրջ վնասվածքներ է ստացել, նշում է ՌԴ ՔԿ-ն:

Պարզվել է նաև, որ մեղադրյալները փող են շորթել ու մեքենա վերցրել օտարերկրյա քաղաքացուց՝ սպառնալով նրան խայտառակող տեղեկություններ տարածել:

Քրեական գործն ուղարկվել է դատարան՝ ըստ էության քննության:

Ավելի վաղ հայտնվել է, որ Ինգուշեթիայի ՆԳՆ ծայրահեղականությանը հակազդեցության կենտրոնի աշխատակիցները՝ դրա նախկին պետ Թիմուր Խամխոևի գլխավորությամբ, մեղադրվել են սպանության, ավազակության, շորթման, ինչպես նաև բռնության գործադրմամբ պաշտոնեական լիազորությունների վերազանցման մեջ:

Քննության վարկածի համաձայն, 2016թ. հուլիսի 15-ին ոստիկանները հիշյալ կենտրոնի շենքում ֆիզիկական բռնություն են կիրառել բանկի գանձապահ Մարեմ Դալիևայի և նրա ամուսնու՝ Մագոմեդի, նկատմամբ: Իրավակարգի պահապանները ձերբակալվածներից պահանջել են հուլիսի 11-ին Ռոսսելխոզբանկի ռեգիոնալ մասնաճյուղի օֆիսի վրա ավազակային հարձակման կազմակերպման ու իրականացման մասին խոստովանություններ անել՝ այդ ժամանակ հափշտակվել է 12 մլն-ից ավելի ռուբլի:

Ինչպես պարզել են քննիչները, ամուսիններին հարվածներ են հասցրել կոշտ, բութ առարկայով՝ դեմքերին ու մարմնի այլ մասերին, որից հետո փակել են Դալիևին օդի մուտքը: Դրա հետևանքով նա մահացել է ասֆիքսիայից ծառայողական աշխատասենյակում:

Քննիչները նաև կարծում են, որ 2016թ. նոյեմբերի 9-ին Կենտրոնի աշխատակիցները Ադրբեջանի քաղաքացուն ամայի վայր են տարել, խլել նրա թանկարժեք ավտոմեքենան ու բջջային հեռախոսը, ինչպես նաև նրանից պահանջել մեկ ամսվա ընթացքում 800 հազար ռուբլի փոխանցել:

Նախկին ոստիկաններին մեղսագրվում է նաև, որ նրանք ծեծել են տեղացի բնակիչներին, որոնցից մեկին կասկածել են հարսանիքի ժամանակ հրաձգության, իսկ երկրորդին՝ Կենտրոնի աշխատակցի կյանքի հանդեպ ոտնգություն կատարելու մեջ: Եվս մեկ ձերբակալվածի, ըստ քննության վարկածի, ոստիկանները խոշտանգել են էլեկտրական հոսանքով:

Աղբյուր` Փաստինֆո