Փաստ ինֆո

Սոցիալական ոլորտում, մասնավորապես, ՀՀ աշխատանքի և սոցիալական հարցերի նախարարության աշխատակազմի ՀՀ բժշկասոցիալական փորձաքննության գործակալության ներսում ղեկավարի ու ենթակաների միջև կաշառք ստանալու ու կաշառք տալու գործով այսօր սկսվեց դատաքննությունը:

13 մեղադրյալով այս գործով առաջին դատական նիստը նշանակվել է դեռևս շուրջ յոթ ամիս առաջ:

Ըստ մեղադրական եզրակացության, ՀՀ աշխատանքի և սոցիալական հարցերի նախարարության աշխատակազմի ՀՀ բժշկասոցիալական փորձաքննության գործակալության պետ Արմեն Սողոյանը Երևանի Կոմիտասի և Արմենակյան փողոցներում գտնվող աշխատասենյակներում ընդունել է Ժաննա Հովհաննիսյանին և իրեն ենթակա ԲՍՓ հանձնաժողովների մնացած նախագահներին ու խախտելով «Հանրային ծառայության մասին» ՀՀ օրենքի 23-րդ հոդվածով սահմանված արգելքը` մեկ միասնական դիտավորությամբ նրանցից ստացել է առանձնապես խոշոր չափերով` ընդհանուր առմամբ 1.528.600 դրամին համարժեք կաշառք:

Ըստ Երևանի թիվ 6 բժշկասոցիալական փորձաքննության հանձնաժողովի նախագահ Ժաննա Հովհաննիսյանին առաջադրված մեղադրանքի, նա 2016թ. դեկտեմբերի 22-ին Արմեն Սողոյանին՝ վերջինիս աշխատասենյակում, տվել է 200.000 ՀՀ դրամ կաշառք: Արմեն Սողոյանն էլ, ըստ մեղադրական եզրակացության, պարտավոր լինելով օրենքով սահմանված կարգով համապատասխան պաշտոնատար անձանց տեղեկացնել իր ենթակայի կատարած կոռուպցիոն բնութի իրավախախտումների մասին, ի պաշտոնե միջոցներ չի ձեռնարկել նրա ապօրինությունները կասեցնելու ու բացահայտելու ուղղությամբ:

Գործով ամբաստանյալների թվում են նաև՝ ՀՀ բժշկասոցիալական փորձաքննության գործակալության վերափորձաքննության բաժնի պետ Արամ Պետրոսյանը, ՀՀ բժշկասոցիալական փորձաքննության հանձնաժողովի նախագահ Արոնա Սիմոնյանը, Արարատի մարզի թիվ 2 բժշկասոցիալական փորձաքննության նախագահ Զորիկ Մկրտչյանը, Շիրակի մարզի թիվ 3 բժշկասոցիալական փորձաքննության հանձնաժողովի նախագահ Երեմ Մարգարյանը, Սյունիքի մարզի թիվ 2 բժշկասոցիալական փորձաքննության հանձնաժողովի նախագահ Լիլիա Մանուցյանը, Երևան քաղաքի թիվ 1 բժշկասոցիալական փորձաքննության հանձնաժողովի նախագահ Արմեն Ավետյանը, Կոտայքի մարզի բժշկասոցիալական փորձաքննության հանձնաժողովի նախագահ Ժիրայր Պետրոսյանը, Արմավիրի մարզի բժշկասոցիալական փորձաքննության հանձնաժողովի նախագահ Արշավիր Հմայակյանը, Արարատի մարզի թիվ 1 բժշկասոցիալական փորձաքննության հանձնաժողովի նախագահ Ալլա Թովմասյանը, Վայոց Ձորի բժշկասոցիալական փորձաքննության հանձնաժողովի նախագահ Ցիալա Խուդինյանը, Երևան քաղաքի թիվ 6 բժշկասոցիալական փորձաքննության հանձնաժողովի Բժիշկ-փորձագետ Շողիկ Ավետիսյանը:

Արմեն Սողոյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով՝ առանձնապես խոշոր չափերով կաշառք ստանալը, Ժաննա Հովհաննիսյանին՝ ՀՀ քրեական օրենսգրքի 312-րդ հոդվածի 2-րդ մասով՝ խոշոր չափերով կաշառք տալը, 311-րդ հոդվածի 3-րդ մասի 2-րդ, 3-րդ կետերով՝ մի խումբ անձանց կողմից նախնական համաձայնությամբ խոշոր չափերով կաշառք ստանալը, 178-րդ հոդվածի 2-րդ մասի 1.1 կետով՝ խարդախություն՝ պաշտոնեական դիրքն օգտագործելով, Արամ Պետրոսյանին, Զորիկ Մկրտչյանին, Երեմ Մարգարյանին, Լիլիա Մանուցյանին, Արմեն Ավետյանին, Ցիալա Խուդինյանին, Ժիրայր Պետրոսյանին, Արշավիր Հմայակյանին, Ալլա Թովմասյանին՝ ՀՀ քրեական օրենսգրքի 312-րդ հոդվածի 1-ին մասով, իսկ Արոնա Սիմոնյանին՝ 312-րդ հոդվածի 2-րդ մասով:

Շողիկ Ավետիսյանին մեղադրանք է առաջադրվել ՀՀ քրեական օրենսգրքի 311-րդ հոդվածի 3-րդ մասի 2-րդ և 3-րդ կետերով, 38-34-312-րդ հոդվածի 1-ին մասով՝ կաշառք տալու փորձին օժանդակելը:

Արմեն Սողոյանը մեղադրական եզրակացության եզրափակիչ մասի հրապարակումից հետո հայտարարեց, որ մեղադրանքում իրեն մեղավոր չի ճանաչում:

Իրենց առաջադրված մեղադրանքները չընդունեցին նաև ամբաստանյալներ Արամ Պետրոսյանը, Արմեն Ավետյանը, Արշավիր Հմայակյանը, Ալլա Թովմասյանը, Շողիկ Ավետիսյանը: Ամբաստանյալներ Ժաննա Հովհաննիսյանն ու Զորիկ Մկրտչյանը առաջադրված մեղադրանքն ընդունեցին ամբողջությամբ։ Իսկ ամբաստանյալ Արոնա Սիմոնյանը հայտարարեց, որ մեղսագրվող արարքում իրեն մեղավոր չի ճանաչում, բայց արարքի համար զղջում է:

Արմաբաստանյալներ Երեմ Մարգարյանն ու Ժիրայր Պետրոսյանը մեղադրանքի վերաբերյալ դիրքորոշում չհայտնեցին, իսկ Լիլյա Մանուցյանն ու Ցիալա Խուդինյանը առաջադրված մեղադրանքում իրենց մասնակի մեղավոր ճանաչեցին։

Աղբյուր` Փաստինֆո