Փաստ ինֆո

Երևան քաղաքի ընդհանուր իրավասության դատարանը, դատավոր Վարդան Գրիգորյանի նախագահությամբ, քիչ առաջ բավարարեց զանգվածային անկարգությունները կազմակերպելու մեջ մեղադրվող Անդրիաս Ղուկասյանի նկատմամբ խափանման միջոց ընտրված կալանավորումը փոփոխելու վերաբերյալ նրա պաշտպանների միջնորդությունը:

Անդրեաս Ղուկասյան ազատ կարձակվի անմիջապես դատական նիստի ավարտից հետո:

Նշենք, որ երկարատև ընդմիջումից հետո այսօր կայացած դատական նիստում պաշտպանական կողմը միջնորդեց փոփոխել Անդրիաս Ղուկասյանի նկատմամբ խափանման միջոց ընտրված կալանավորումը՝ խափանման միջոց ընտրելով չհեռանալու ամսին ստորագրությամբ:

Դատարանի դահլիճում, բացի հասարակական գործիչներից, ներկա է նաև Հայաստանում ԵՄ դեսպան Պյոտր Սվիտալսկին, ով գործի վերաբերյալ կարծիք հայտնել չցանկացավ և նշեց որ դատարանում է մոնիտորինգ իրականացնելու նպատակով:

Ըստ մեղադրանքի՝ Անդրիաս Ղուկասյանը 2016թ. հուլիսի 29-ին Երևան քաղաքում կազմակերպել է զանգվածային անկարգություններ, ինչպես նաև փորձել է միանալ 2016թ. հուլիսի 17-ին Երևան քաղաքի Մ.Խորենացի փողոցի 158 հասցեում տեղակայված՝ ՀՀ ոստիկանության Երևան քաղաքի վարչության պարեկապահակային ծառայության գնդի տարածքում գտնվող շենքերը, շինությունները և տրանսպորտային միջոցները զավթած, ոստիկաններ և բուժաշխատակիցներ պատանդ վերցրած կազմակերպված, զինված խմբին, զինվել, ապօրինի կերպով հրազեն ու ռազմամթերք կրել, պահել և խմբի անդամների հետ համակատարմամբ շարունակել պահել զավթածն ու պատանդներին, սակայն հանցագործություններն ավարտին չի հասցրել իր կամքից անկախ հանգամանքներով:

Անդրիաս Ղուկասյանին մեղադրանք է առաջադրվել ՀՀ քրեական օրենսգրքի 225-րդ հոդվածի 1-ին մասով, 34-219-րդ հոդվածի 3-րդ մասի 1-ին կետով, 34-218-րդ հոդվածի 3-րդ մասի 1-ին կետով և 34-235-րդ հոդվածի 3-րդ մասով:

Աղբյուր` Փաստինֆո