Փաստ ինֆո

Վերջին շրջանում ավազակային հարձակումներ կատարողների թիրախում են հայտնվել բանկերն ու բանկոմատները և, ոչ ավել ոչ պակաս, բացահայտված հանցագործությունները վկայում են՝ բանկերից և բանկոմատներից հափշտակության դիմում են բանկերի կամ իրավապահ մարմինների աշխատակիցները:

Թերևս ոչ վաղ անցյալում բացահայտված աղմկահարույց դեպքերից էր «Կոնվերսբանկ»-ից և «ՎՏԲ-Հայաստան» բանկից խոշոր չափերի հասնող հափշտակության դեպքերը:

Դեռևս նախորդ տարի հոկտեմբերի 9-ին «Կոնվերսբանկ»-ի «Սայաթ-Նովա» մասնաճյուղն ավազակային հարձակման էր ենթարկվել. 200 հազար դոլարին համարժեք գումար է հափշտակվել:

Ավազակային հարձակումը բացահայտվել է. մի քանի անձանց կողմից դերաբաշխմամբ էր այն կատարվել, սակայն բուն հափշակությունը կատարած անձը հետախուզվում էր և հայտնաբերվեց միայն դեկտեմբերի 17-ին՝ Վրաստանի տարածքում: Գործով անցնող Պյոտր Ցիգանկովից բացի, ևս երեք անձի մեղադրանք է առաջադրվել:

Հաջորդ դեպքն էլ գրանցվել էր «ՎՏԲ-Հայաստան բանկ»-ի «Եղեգնաձոր» մասնաճյուղում: Այս դեպքը հունվար ամսին է տեղի ունեցել և նախնական քննության տվյալներով՝ տարբեր բանկոմատների լիցքավորման և լիցքաթափման գործընթացի ժամանակ մաս-մաս յուրացվել էր ընդհանուր 42.316.000 ՀՀ դրամ գումար: Հայտնի է նաև, որ քրեական գործով մեղադրանք է առաջադրվել «Եղեգնաձոր» մասնաճյուղի գործառնական բաժնի պետ Ն.Հարությունյանին:

Հաջորդ ավազակային հարձակում ևս «ՎՏԲ-Հայաստան բանկ»-ի վրա էր կատարվել: Այս անգամ փետրվարի 19-ին ավազակային հարձակման էր ենթարկվել Բաղրամյան պողոտայում գտնվող «ՎՏԲ-Հայաստան» բանկի մասնաճյուղը: Բանկ էին մտել 2 անձինք և հափշտակել մոտ 8,5 մլն տարբեր արտարժույթի դրամական միջոցներ:

«ՎՏԲ Հայաստան բանկ»-ի բանկոմատից կատարված հափշտակության փորձի մի դեպք էլ գրանցվել էր 2016 թվականի դեկտեմբերի 16-ին: Բաղրամյան պողոտա 56 հասցեում գտնվող «ՎՏԲ Հայաստան բանկ» ՓԲԸ-ի 4-րդ մասնաճյուղի բանկոմատին ամրացված էր եղել գազի բալոն և այլ համակարգ՝ ամենայն հավանականությամբ նպատակ ունենալով պայթյունի եղանակով բացել բանկոմատը և առկա առանձնապես խոշոր չափերի գումարը հափշտակել, սակայն հանցագործությունն ավարտին չէր հաջողվել հասցնել: Հանցագործությունը բացահայտվեց և հայտնի դարձավ հանցագործությունը կատարած անձի ինքնությունը, ով աշխատում էր ՀՀ ԱՆ ՔԿՎ «Հրազդան» քրեակատարողական հիմնարկում:

Իսկ նախօրեին ավազակային հարձակման է ենթարկվել HSBC բանկի` Կոմիտասի պողոտա-Գյուլբենկյան փողոց խաչմերուկում գտնվող մասնաճյուղը: Եվ ինչպես դեպքից հետո անմիջապես պարզվեց, ավազակային հարձակում կատարած անձը, դանակով, նռնակով, հրացանով զինված, ներխուժել է բանկ, վիրավորել երկու աշխատակցի, որոնցից մեկը մահացել էր, իսկ մյուսը ով ծանր մարմնական վնասվածք էր ստացել և տեղափոխվել էր հիվանդանոց, ժամեր անց՝ մահացավ: Պարզվեց նաև, որ վերջինս ոստիկան է՝ ՊՊԾ ջոկի հրամանատար Արա Շախգուլյանն է, ով համակարգում էր ծառայում 2000 թվականից:

Նշենք, որ ավազակային հարձակում կատարած անձին չի հաջողվել փախուստի դիմել, նրան վնասազերծել են և, ինչպես հայտնեց ոստիկանությունը, նրա ինքնությունը ևս պարզվել է. ո՛չ ավել ո՛չ պակաս նա Ճանապարհային ոստիկանության տեսանկարահանման միջոցով հայտնաբերված խախտումների արձանագրման կենտրոնի պետ, ոստիկանության գնդապետ Դանիել Դանիելյանն է:

Նշենք նաև, որ բանկերի և բանկոմատների վրա կատարված ավազակային հարձակման դեպքերի փաստով հարուցված քրեական գործերով անցնող մեղադրյալներից երկուսն իրավապահ մարմնի ներկայացուցիչներ են:

Թերևս այս հանգամանքը մտահոգիչ է, իրավապահ մարմնի ներկայացուցիչները, ովքեր կոչված են անվտանգություն ապահովելու, օրենքի ուժով կարգ ու կանոն հաստատելու, նման ծայրահեղ քայլերի են դիմում:

Աղբյուր` Փաստինֆո