Փաստ ինֆո

Եթե կլինի Ազգային ժողովի պատգամավորների մեկ երրորդի կողմից առաջադրում, ապա Հանրապետական կուսակցության խմբակցությունը կաջակցի վարչապետի թեկնածուի ընտրությանը:

«Ազատություն» ռադիոկայանի հետ հարցազրույցում հայտարարել է ՀՀ ԱԺ փոխխոսնակ, ՀՀԿ-ական Էդուարդ Շարմազանովը: Նա պարզաբանել է, որ աջակցել նշանակում է կապահովվի, որպեսզի վարչապետի թեկնածուն ունենա 53 ձայն կամ միգուցե ավել, որպեսզի դառնա վարչապետ:

«Արդյոք սա նշանակում է, որ բոլորը միասնական կողմ պետք է քվեարկեն, ես չեմ կարծում, որ այո, որովհետև Պոլիտբյուրոն չի, ոչ էլ Բրեժնևին ենք ընտրում, որ միաձայն ընտրենք: Սա իմ անձնական տեսակետն է, բայց կարծեմ էականը նա է, որ չգնանք ներքաղաքական ճգնաժամի խորությանն ու առճակատմանը, և մայիսի ութին Հանրապետական խմբակցությունը միգուցե էլի ունենալով քաղաքական հստակ դիրքորոշումները, տեսլականը, չտեսնելով նաև Փաշինյանին վարչապետի և Գերագույն գլխավոր հրամանատարի պաշտոնում, այնուհանդերձ, չի խոչընդոտի, ավելին՝ ոչ միայն չի խոչընդոտի, այլև կաջակցի, այո՛, իր ձայներով: 45 ձայն իրենք ունեն, կապահովենք, որպեսզի ունենանք վարչապետ»,- ասել է Է.Շարմազանովը:

ՀՀ ԱԺ փոխխոսնակը հայտարարել է նաև, որ իր տեսակետը չի փոխվել և դա բացարձակապես անձնական չէ, դա քաղաքական դիրքորոշում է, և որ ինքը շարունակելու է պաշտպանել այդ քաղաքական դիրքորոշումը ապագա ծրագրերի, ապագա նույն Ընտրական օրենսգրքի հետ կապված: Է.Շարմազանովը նշել է, որ ինքն անձնապես քվեարկելու է այնպես, ինչպես քվեարկել է մայիսի մեկին անցկացված վարչապետի ընտրության քվեարկությանը, այսինքն՝ դեմ:

Աղբյուր` Փաստինֆո