Փաստ ինֆո

Եթե հաշվի առնել այսօր հնչած հայտարարությունները՝ ՀՀ վարչապետի ընտրության երկրորդ փուլում ժողովրդի թեկնածուի ընտրության հարցը գործնականում լուծված է: Այս մասին այսօրվա հանրահավաքում հայտարարեց ժողովրդի վարչապետի թեկնածու Նիկոլ Փաշինյանը: Նա պարզաբանեց, որ «Ծառուկյան դաշինք» ու «ՀՅԴ» խմբակցությունների ղեկավարները իրեն հայտնել են, որ պաշտպանելու են ժողովրդի թեկնածուի ընտրությունը, իսկ ՀՀԿ խմբակցությունը հայտարարել է, որ աջակցելու է ԱԺ մեկ երրորդի կողմից առաջադրված թեկնածուի ընտրությանը:

Ուստի Նիկոլ Փաշինյանը հայտնեց ցուցարարներին, որ վաղը Երևանում ու հանրապետությունում ոչ մի ակցիա չեն իրականացվելու, իսկ իրենք զբաղվելու են աշխատանքով, ՀՀԿ խմբակցության մասով նաև հավաստիանալով, որ նրանց աջակցությունը երաշխավորված է:

Եթե ամեն ինչ նորմալ ընթանա, «պատրաստվում ենք վարչապետի ընտրությանը ու հավաքվում ենք ոչ թե 250, այլ 500 հազարով», ասաց նա:

Նիկոլ Փաշինյանը նշեց, որ ավելի վաղ նախատեսել էր ավելի ծավալուն ելույթով հանդես գալ, սակայն օրվա ընթացքում քաղաքական իրավիճակը փոխվեց և ըստ էության այդ ելույթը դարձավ ժամանակավրեպ:

Նախօրեին Ազգային ժողովում տեղի ունեցածն՝ վարչապետի ընտրության գործընթացում, ըստ Նիկոլ Փաշինյանի, ՀՀԿ-ի պահվածքն երեք հիմնական նպատակ ուներ.

Առաջին՝ ՀՀԿ-ն հույս ուներ, որ հարցուպատասխանի ընթացքում «չգիտեմ ինչ է տեղի ունենալու», և ժողովուրդը միանգամից փոխելու է իր տեսակետը ընդդեմ Սերժ Սարգսյանի վարչապետության շարժման ու նրա ղեկավարի մասին, դա չաշխատեց:

Երկրորդ, ՀՀԿ-ն հույս ուներ, որ իրենց պահվածքը կբորբոքի ժողովրդին ու հնարավոր կլինի այդ ֆոնին սադրանքներ կազմակերպել, դա ևս չաշխատեց:

Երրորդ, ՀՀԿ-ն հույս ուներ, խրոխտ դեմ քվեարկելուց հետո ժողովուրդը կհուսահատվի ու հանրահավաքի մասնակիցների թիվը կպակասի:

Սակայն այն, ինչ տեղի ունեցավ այսօր, աննախադեպ էր շարժման համար՝ Երևանում ու հանրապետությունում չի եղել և ոչ մի բաց ճանապարհ, «Զվարթնոց» օդանավակայանը փակված է եղել:

Սակայն ամենասենսացիոն այն էր, որ այսօր առավոտյան Թումանյան փողոցը փակվել էր չինացի զբոսաշրջիկների կողմից, որոնք պահանջել էին ժողովրդի թեկնածուին ընտրել ՀՀ վարչապետ:

Աղբյուր` Փաստինֆո