Փաստ ինֆո

«Ելք» խմբակցության կողմից ՀՀ վարչապետի թեկնածու առաջադրված Նիկոլ Փաշինյանին ուղղված ԱԺ պատգամավորների հարց ու պատասխանից հետո ելույթով հանդես գալու համար հերթագրվեցին 19 պատգամավոր:

Ելույթով առաջինը հանդես եկավ ԱԺ փոխխոսնակ, ՀՀԿ խոսնակ Էդուարդ Շարմազանովը:

Այսօր մեր երկրում նոր իրողություններ են և նոր իրավիճակ: Միևնույն ժամանակ հարկ եմ համարում նշել, որ այս օրերին իշխանությունը ցուցաբերել է բացառիկ հանդուժողականություն, զսպվածություն և հասարակությանը մերոնքների և ձերոնքների չբաժանելուն անկախ նրանից, թե դուք դա ընդունում եք, թե՝ ոչ, դա այդպես է:

Մենք չենք գնացել մերժողական ճանապարհով՝ պատրաստ ենք եղել և պատրաստ ենք երկխոսության, բայց ոչ երբեք՝ վերջնագրերի:

Շարմազանովն իր ելույթում նշեց՝ Հայաստանում ժողովրդական արժեքներն այլընտրանք չպետք է ունենան: Մենք պարտավոր ենք բոլորս հարգել բազմակարծությունը, այլակարծությունը և ինձ համար անընդունելի է որևէ ճնշման միջոցով փորձել ազդել որևէ պատգամավորի կարծիք արտահայտելու վրա: Մենք այստեղ բոլորս հանրության ընտրյալներն ենք, և յուրաքանչյուրս մեր խղճի մտքով կընտրենք մեր վարչապետին՝ դեմ կամ կողմ քվեարկությամբ:

Այսօր մենք ընտրում ենք ոչ թե համաժողովրդական տրիբուն կամ հռետոր, այլ գործադիրի ղեկավար, որը նախ և առաջ պետք է աչքի ընկնի քաղաքական քայլերի կանխատեսելիությամբ և քաղաքական հստակ գաղափարախոսությամբ:

Ըստ Շարմազանովի՝ կանխատեսելի նշանակում է հայեցողական հարցերում լինել հետևողական և անփոփոխ: Ո՞վ է լինելու Ձեր ընտրվելու պարագայում առաջին փոխվարչապետը, փոխվարչապետերը, Պաշտպանության նախարարը, Ֆինանսների նախարարը, Ոստիկանության պետը, ԱԱԾ ղեկավարը, Էկոնոմիկայի նախարարը, ովքե՞ր՝ պատասխան չկա:

«Ընդամենն ամիսներ առաջ դուք և ԵԼՔ խմբակցությունը իշխանություններից պահանջում էիք դուրս գալ Եվրասիական միությունից, այսօր ասում եք՝ իրողություն է փոխվել: Կներեք, երբ մենք էինք խոսում իրողությունների փոփոխությունների մասին, դուք մեզ մեղադրում էիք ստախոսության մեջ»,- ասաց Շարմազանովը՝ հավելելով. «կարծում եմ առնվազն արդար չէ»:

Ինչ վերաբերում է Արցախյան հիմնահարցին, ապա այստեղ դուք որևէ հայեցակարգ չներկայացրեցիք՝ ինչպե՞ս եք բանակցելու, ո՞րն է Ձեր փոխզիջման գինը, գնալո՞ւ եք փոխզիջումների, ի՞նչ է լինում 7 ազատագրված տարածքների ճակատագիրը:

Ասում եք ռազմական բյուջեն կավելացնեք՝ շատ լավ է, որ կավելացնենք, ինչպե՞ս:

Շարմազանովի գնահատմամբ՝ այդ հարցի պատասխանը չստացվեց:

Քաղաքական գործչի պարագայում ամենակարևորը գաղափարախոսության առկայությունն է՝ անհնար է լինել մի քիչ սոցիալիստ, մի քիչ պահպանողական, մի փոքր էլ լիբերալ: Քաղաքական գործիչը պետք է ունենա հստակ գաղափարախոսություն: Այդպես է քաղաքակիրթ աշխարհում, Վաշինգտոնից մինչև Փարիզ, Բրուսելից մինչև Մոսկվա:

Էդուարդ Շարմազանովի խոսքով՝ հույս է ունեցել լսել վարչապետի թեկնածուի հայեցակարգային ելույթ, բայց ականատես է եղել ժողովրդի ականջը շոյող ոչ ծրագրային ելույթի:

Հարգելի բարեկամներ, մենք ևս մտահոգ ենք մեր հայրենիքում առկա խնդիրներով, մենք չենք ժխտում, որ մեր երկրում եղել է ու կա կոռուպցիա և անարդարություն և անկախ նրանից, թե ով կլինի վաղվա իշխանությունը, մենք պետք է խոսենք ոչ թե վերջնագրերով, այլ՝ երկխոսության գնանք: Իմ գնահատականները բացառապես քաղաքական են, և այստեղ չկա որևէ անձնական վերաբերմունք:

«Պարոն Փաշինյան, ինչպես երեկ, այնպես էլ այսօր դուք ինձ չհամոզեցիք, ես չեմ տեսնում Ձեզ գերագույն գլխավոր հրամանատարի դերում»,- ասաց Շարմազանովը՝ հավելելով՝ ինչպես ապրիլի 17-ին, այսօր ևս խոսքս ավարտում եմ հետևյալ արտահայտությամբ. եթե ոմանց պետք են ուժեղ ցնցումներ, մեզ պետք է ուժեղ, միասնական, ժողովրդավարական ու ազգային Հայաստան:

Աստված պահապան հայ ժողովրդին, Հայաստանի Հանրապետության յուրաքանչյուր քաղաքացուն:

Աղբյուր` Փաստինֆո