Փաստ ինֆո

Հայաստանի վարչապետի պաշտոնում Նիկոլ Փաշինյանի ընտրվելու պարագայում ՀՀ-ն շարունակելու է մնալ Եվրասիական տնտեսական միության ու Հավաքական անվտանգության պայմանագրի կազմակերպության անդամ: Այս մասին իր ծրագրային ելույթում հայտարարեց ՀՀ վարչապետի թեկնածու Նիկոլ Փաշինյանը, հավելելով, որ այդ դիրքորոշումը բխում է ոչ թե ինչ-որ անձի ճաշակից, ոչ թե ինչ-որ անձի դիրքորոշման փոփոխությունից, այլ Հայաստանի ժողովրդին հաղթանակ բերած համաժողովրդական շարժման տրամաբանությունից: Վերջինս, ըստ Ն.Փաշինյանի, որևէ փոփոխություն չի պահանջել ու պահանջում արտաքին քաղաքականության ոլորտում, և «մենք՝ որպես ժողովրդի հլու ծառաներ, պարտավոր ենք հաշվի առնել ու հաշվի նստել այս ուղերձի հետ»:

Ն.Փաշինյանն ընդգծեց, որ իրենք Ռուսաստանին համարել ու համարում են Հայաստանի ռազմավարական դաշնակից, և համաժողովրդական այս շարժումը հայ-ռուսական հարաբերությունների համար որևէ սպառնալիք չի ստեղծում: Իրենք առանձնահատուկ կարևորություն են տալիս Հայաստան-Իրան ու Հայաստան-Վրաստան հարաբերություններին և որևէ կասկած չկա քաղաքական այս գործընթացն նոր շունչ ու էներգիա է տալու Հայաստանի անմիջական հարևանների հետ մեր հարաբերություններին, ասաց նա:

Խորացվելու են Եվրամիության և ԵՄ երկրների հետ հարաբերությունները, ամեն ինչ արվելու է Հայաստանի քաղաքացիների համար ԵՄ երկրներ մուտքի արտոնագրի պահանջի վերացման ուղղությամբ: «Ակնկալում ենք դրա շուրջ բանակցություններ սկսել ամենամոտ ապագայում: Համապարփակ ու ընդլայնված գործընկերության համաձայնագրի շուտափույթ վավերացումը և ամբողջական կիրարկումը բխում է մեր շահերից»,- ասաց ՀՀ վարչապետի թեկնածուն:

Ըստ Ն.Փաշինյանի, ԱՄՆ-ի հետ բարեկամական հարաբերությունները նոր խթանի կարիք ունեն: «Մենք նպատակադրված ենք հստակ ու գործնական քայլեր ձեռնարկել Միացյալ Նահանգների հետ տարբեր ոլորտներում փոխգործակցությանը զարկ տալու համար: Մենք խորացնելու ենք հարաբերությունները Չինաստանի հետ, և այդ արտաքին քաղաքական ուղղությունը համարում ենք շատ կարևոր»:

Վարչապետ ընտրվելու պարագայում «մենք հավատարիմ ենք Հայոց ցեղասպանության միջազգային ճանաչման և դատապարտման գործընթացին, քանզի համոզված ենք, որ միայն ոճրի ճանաչման միջոցով է հնարավոր կանխարգելել նման հանցագործությունները»: Մարդկության դեմ հանցագործությունների և ցեղասպանությունների կանխարգելման ուղղությամբ Հայաստանը շարունակելու է առաջամարտիկի դեր խաղալ, ասաց վարչապետի թեկնածուն:

Նիկոլ Փաշինյանն արձանագրեց, որ ղարաբաղյան հիմնախնդրի խաղաղ՝միջազգային իրավունքի վրա հիմնված, կարգավորման գործընթացում կարծրատիպերը մեզ համար պարտադիր չեն, կենսական է Արցախի ժողովրդի՝ իր ճակատագիրն ինքնուրույն որոշելու անքակտելի իրավունքի և դրա իրացման միջազգային ճանաչումը:

«Ղարաբաղյան հիմնախնդրի առումով մենք հանձնառու ենք բացառապես խաղաղ կարգավորմանը, որի հիմքում պետք է ընկած լինի ժողովուրդների իրավահավասարության և ինքնորոշման սկզբունքը: Նոր լիցք պետք է հաղորդել Արցախի Հանրապետության միջազգային ճանաչման գործընթացին, որը աշխարհասփյուռ հայության գործունեության կարևորագույն ուղղություններից պետք է դառնա»,- ասաց Նիկոլ Փաշինյանը :

Աղբյուր` Փաստինֆո