Փաստ ինֆո

Մենք ունենք քաղաքական ճգնաժամ, ունենք նոր քաղաքական իրողություններ և դրանց լույսի ներքո պետք է անենք հետևություններ ու լուծումներ գտնենք: Այս մասին ՀՀ վարչապետի ընտրությանը նվիրված ԱԺ նիստում հայտարարեց ԱԺ «Ելք» խմբակցության անդամ Էդմոն Մարուքյանը:

Երկրում անդառնալի փոփոխություններ են տեղի ունեցել, և դրանք միայն դրական են՝ կա քաղաքացիական զարթոնք, կա այնպիսի փոփոխություն, որի արդյունքում մեր երկիրը զարգանալու հնարավորություն ունի, ասաց նա:

«Թավշյա հեղափոխությունը հասել է այնպիսի մի հանգրվանի, որ պետք է ստանա սահմանադրական ձևակերպում: Հեղափոխության կանոնն է՝ ով նախաձեռնել է, կազմակերպել է այն, ով որ հաջող հասցրել է իր այսօրվա հանգրվանին, նա պետք է ստանձնի պատասխանատվություն, և այդ մարդը Նիկոլ Փաշինյանն է»,- ասաց պատգամավորը՝ հավելելով, որ Հայաստանում առկա ճգնաժամն լուծումն ունի մեկ տարբերակ՝ Նիկոլ Փաշինյանի այսօր, հիմա, այս խորհրդարանում վարչապետ ընտրելն է:

Դիմելով Հանրապետական կուսակցության պատգամավորներին՝ Էդմոն Մարուքյանը հայտարարեց. «Դուք հասցրել եք նրան, որ իշխանության, թե քաղաքական մոնոպոլիայով մենք հասել ենք մի իրավիճակի, որ հիմա ունենք քաղաքական ճգնաժամ: Պետք է դա լուծել և դրա լուծումը Փաշինյանի վարչապետ ընտրելու մեջ է»:

Ըստ Է.Մարուքյանի, հնարավորություն կա այս զարթոնքը վերածելու ներդրումների, կոռուպցիայի դեմ, մոնոպոլիաների դեմ, ատելության դեմ պայքարի:

«Եթե չենք ունենում հեղափոխության նյութականացումը՝ Փաշինյանին վարչապետ ընտրելը, մենք ունենում ենք հուսալքված քաղաքացիներ, քաղաքական ճգնաժամի շարունակություն, որը կարող է ունենալ անդառնալի հետևանքներ»,- ասաց «Ելք» խմբակցության պատգամավորը, հավելելով ուզում եք Արցախն ավելի պաշտպանվա՞ծ լինի, ուզում եք տնտեսությունը զարգանա՞, ուզում եք, որ Հայաստանը սանկցիաների տակ չընկնի՞, ուզում, տանկերը, որ գալիս են, բայց իրականության մեջ չեն էլ գալիս, չգա՞ն, պետք է հիմա քվեարկեք Նիկոլ Փաշինյանի օգտին: Կայունությունը, ըստ Էդմոն Մարուքյանի, քաղաքական ճգնաժամի լուծումն է, այն կարող է այս վիճակից երկիրը հանել:

«Պետության մասին չէի՞ք մտածում, որ մարդկանց հերթ էիք կանգնեցրել, տասը հազար դրամ էիք բաժանում, որ ընդդիմության իրավունքները ոտնահարում էիք, պետության մասին չէի՞ք մտածում: Արժանապատիվ կերպով դուք կարող եք հայտարարել, որ հանուն մեր պետության, հանուն Արցախի, հանուն մեր տնտեսության, հանուն այս երիտասարդության մենք բոլորով քվեարկում ենք Փաշինյանի օգտին, թող կառավարությունը ձևավորի, գա, շարունակենք մեր երկխոսությունը»,- դիմելով իշխող կուսակցության խմբակցության պատգամավորներին՝ ասաց ընդդիմադիր խմբակցության պատգամավորը:

Աղբյուր` Փաստինֆո