Փաստ ինֆո

Անթույլատրելի է հանրային ճանաչում ունեցող մեկ անձով գնալ չգտեմ ուր, չգիտեմ ոնց, բայց ասել, թե գիտենք ինչի համար ենք գնում: ԱԺ-ում հայտարարեց ՀՀԿ-ական պատգամավոր Արման Սաղաթելյանը:

Յուրաքանչյուր կառավարման համակարգ ունի իր տրամաբանությունը, գործունեության մեխանիզմը, փիլիսոփայությունը: Դրանց հակառակ արված ցանկացած քայլ բերում է ծանր հետևանքների: Հարկադրանքը, դրա ցանկացած դրսևորումը կամ սպառնալիքը հակահամակարգային են և կործանարար:

Պառլամենտական կառավարման ձևի պայմաններում կառավարություն ձևավորվում է պառլամենտական մեծամասնության կողմից և ձևավորում է այն ուժը, որը ունի այդ մեծամասնությունը: Պառլամենտը արձակվում է, եթե այն ի զորու չի լինում ձևավորել կառավարություն:

Ի հեճուկս բոլոր չկամեցողների՝ իշխող մեծամասնությունը առավել քան միասնական է:

Կառավարության գործունեության համար պատասխանատվություն է կրում այն քաղաքական ուժը, որը կազմավորել է պառլամենտական մեծամասնություն: Քաղաքական պատասխանատվություն կրողը շարժումն է ձևակերպումը՝ կեղծ կատեգորիա է:

Արման Սաղաթելյանը խնդրեց չաղավաղել իր խոսքերը՝ կեղծ է այն՝ որպես քաղաքական պատասխանատվության սուբյեկտ դիտարկելը:

Քաղաքական ուժերը կողմ են քվեարկում մեկ այլ քաղաքական ուժի թեկնածուին, եթե նրա հետ կազմավորել են կոալիցիա և նրան հավասար ստանձնել քաղաքական պատասխանատվություն, ցանկացած այլ դրսևորում՝ պատասխանատվությունից խուսափել է, կեղծ մեծամասնության աջակցելու իմիտացիա ստեղծել է:

Պառլամենտում ներկայացված երկրորդ ամենափոքր կոալիցիոն քաղաքական ուժի ղեկավարի առաջադրած թեկնածուին երկու քաղաքական ուժեր պատրաստվում են կողմ քվեարկել վերջինս հետ չունենալով որևէ կոալիցիոն հուշագիր:

Քաղաքականության մեջ հաջողության գրավականը քաղաքական ծրագիրն է և քաղաքական թիմը: Անթույլատրելի է հանրային ճանաչում ունեցող մեկ անձով գնալ չգտեմ ուր, չգիտեմ ոնց, բայց ասել, թե գիտենք ինչի համար ենք գնում:

«Որպես ՀՀ զինված ուժերի հրամանատարական կազմի պահեստազորի սպա՝ ես և իմ զինակից ընկերները կարծում ենք, որ գերագույն հրամանատարի գործառույթ ենթադրող պաշտոնին հավակնելը ենթադրում է ավելին, քան 4 եվրո 9 ցենտ արժողությամբ զինվորական, իսկ ավելի ճիշտ կլինի ասել որսորդական շապիկը և ռազմագիտություն առարկայի շրջանակում ստացած զինվորական գիտելիքները:

Դուք Ձեզ պատկերացնո՞ւմ եք պատերազմական դրության մեջ շրջապատված մի քանի տասնյակ գեներալներով ու ձեր դպրոցական ռազմագիտության գիտելիքներով: Անկեղծ ասած՝ ես՝ ոչ»:

Սաղաթելյանը անկեղծորեն նշել է, որ Փաշինյանը շատ լավ պառլամենտական է, դասական պառլամենտական է, և ինքը կարծում է, որ շատ արագ կարող ենք կորցնել լավ պատգամավորին և արագ ստանանք ոչինչ կամ շատ վատ վարչապետ:

Նա նաև նշեց. «Չեմ ցանկանում հավատալ շրջանառվող այն կարծիքներին, որ անգամ Նիկոլն ու իր ընկերները չեն գիտակցում, որ այս ամենը դրսից ուղղորդվող մի վատ սցենարի սկիզբ է միայն, որի ավարտը Արցախի հարցի ոչ հայանպաստ լուծումն է»:

Հանրապետական պատգամավորը նաև անդրադարձավ 2001 թվականին «Հայկական ժամանակ» թերթի համարում լույս տեսած, Նիկոլ Փաշինյան անունով ստորագրված հոդվածին:

Նշենք, որ մինչ այս ելույթը Սաղաթելյանը հարց ու պատասխանի ժամանակ հնչեցրել էր այս հոդվածի վերաբերյալ իր հարցը, որը Փաշինյանը կեղծիք և դեզինֆորմացիա անվանեց:

«Իմ վերջին ցիտատը, բառացի մեջբերեմ` ըստ բնօրինակի, «և ուրեմն, ինձ զարմացնում է, որ մեր երկրում դեռ կան մարդիկ, ովքեր իլյուզիաներ ունեն գրավյալ, եթե կուզեք ազատագրված, եթե կուզեք օկուպացված տարածքների վերաբերյալ», մեկ նախադասություն հետո` «Ես չեմ ընդունում այդ տեսակետը, թե լավ դիվանագիտությունը կարող է այնպես անել, որ այդ տարածքները չվերադարձվեն Ադրբեջանին»:

Այս հոդվածը թերթում հրապարակվելուց հետո հրապարակվել է armtimes.com կայքում, սակայն բողոքի ալիք բարձրացնելուց հետո հեռացվել է ձեզ իսկ պատկանող՝ «Հայկական ժամանակ» կայքից:

«Անշուշտ Դուք միշտ կարող եք փոխել Ձեր դիրքորոշումը` ելնելով քաղաքական իրողություններից, բայց համոզված եմ, որ այս ամբիոնից ակնհայտ սուտը քաղաքական գործչին հարիր պահվածք չէ»,- իր խոսքը եզրափակեց Արման Սաղաթելյանը:

Աղբյուր` Փաստինֆո