Փաստ ինֆո

Պաշտպանության ու անվտանգության ոլորտում անհրաժեշտ որոշումներ կկայացվեն ՊՆ, Գլխավոր շտաբի, ԱԱԾ համապատասխան պաշտոնյաների զեկույցը հայ-ադրբեջանական շփման գծում և հայ-ադրբեջանական սահմանին տիրող իրավիճակի, հաստատված պլանների վերաբերյալ տեղեկություն ստանալուց, անհրաժեշտ միջոցառումներ ձեռնարկելու վերաբերյալ նրանց կարծիքը լսելուց ու վերլուծելուց հետո:

Այս մասին հայտարարեց ՀՀ վարչապետի թեկնածու Նիկոլ Փաշինյանը՝ պատասխանելով հանրապետական պատգամավոր Կորյուն Նահապետյանի հարցին՝ ՀՀ-ին սպառնացող անմիջական վտանգ է առկա, և կառավարությունը հնարավորություն չունի որոշում կայացնել զինված ուժերի կիրառման վերաբերյալ, ինչպիսի՞ իրավական հնարավորություն եք տեսնում ԶՈՒ-ի կողմից ռազմական դիմակայման շրջանակներում ԶՈՒ առանձին ստորաբաժանումների օգտագործման մասին:

ՀՀ վարչապետի կարգավիճակը քաղաքական կարգավիճակ է առաջին հերթին, հավելեց Ն.Փաշինյանը:

«Ասելով, որ պատրաստ եմ կատարել ՀՀ վարչապետի պաշտոնը, ես նկատի չունեմ, որ ես հանրապետության ամենաուժեղ էներգետիկն եմ, կամ հանրապետության ամենաուժեղ տրանսպորտնիկն եմ, կամ հանրապետության ամենաուժեղ հրետանավորն եմ, կամ հանրապետության ամենաուժեղ հետախույզն եմ, կամ հանրապետության ամենաուժեղ բժիշկն եմ, հանրապետության ամենաուժեղ օդաչուն եմ»,- ասաց վարչապետի թեկնածուն:

Կորյուն Նահապետյանն իր հերթին արձագանքեց՝ խորը ափսոսանք պետք է հայտնեմ, որ տվյալ դեպքում դուք չեք տիրապետում ո՛չ Սահմանադրությանը, ո՛չ «Պաշտպանության մասին» օրենքին:

ՀՀԿ-ական պատգամավորը նաև ափսոսանք հայտնեց, որ վարչապետի թեկնածուն ուղղակի չի կարողանում այս հիմնական բեռն ու պատասխանատվությունը ստանձնել որպես Գերագույն գլխավոր հրամանատար, որովհետև նա չգիտի այն հիմնական իրավական կարգավորումները, որ պետք է վարչապետին, նրան մոլորության մեջ է գցելու և՛ պաշտպանության նախարարը, և՛ ԶՈՒ շտաբի գլխավոր պետը:

Աղբյուր` Փաստինֆո