Փաստ ինֆո

 Ազգային ժողովի ՀՀԿ խմբակցության պատգամավոր Սեյրան Սարոյանը պատգամավորներին հորդորեց  էմոցիաներին չտրվել, այլ նստել կլոր սեղանի շուրջ և լուծում տալ բոլոր հարցերին: «Այսօր պետք է ոչ թե կրակի վրա բենզին լցնել, հին ու նոր բաներ հիշել ու իրար նեղացնել, այլ պետք է ելք փնտրել ստեղծված իրավիճակից»,-ասաց նա՝ ելույթ ունենալով ԱԺ հատուկ նիստում:

Սարոյանի խոսքով՝ մարդիկ այսօր շատ խնդիրներ ունեն, կանգնել են ոտքի, փորձել են իրենց քայլն անել, Սերժ Սարգսյանին մեղադրեցին՝ մոռանալով նրա արած գործերը: «Չկա աշխարհում  այնպիսի մարդ, որ սխալներ  չունենա: Փորձում էինք ամեն ինչ կապել Սերժ Սարգսյանի հետ, այդ մարդն ասեց՝ «լավ, ես գնացի»: Փաստորեն, բանից դուրս է գալիս, որ պաշտոնակռիվ է գնում»,-ասաց ՀՀԿ-ական պատգամավորը՝ հավելելով, որ Հանրապետական կուսակցությունը լիդերներ է ունեցել, իսկ այսօր կարծիք է ձևավորվել, որ Հանրապետականը լավը չի: «Հանրապետականին 800 հազար ձայն է տվել ժողովուրդը»,-ընդգծեց նա:

Սարոյանը հորդորեց ժողովրդին ոչ մի դեպքում չգնալ բախման: «Պետք է խելացի ձևով մտածել, ժողովրդին հանգստացնել, Աստված չանի, որ այս խաղաղ ցույցերը դառնան կրակի բուն: Ում քթից արյուն եկավ, մեղավորությունը մեր բոլորի վրա է»,-նշեց պատգամավորը՝ կոչ անելով ճգնաժամից դուրս գալու համար ուղիներ փնտրել:

Խոսելով ՀՀ վարչապետի միակ թեկնածու Նիկոլ Փաշինյանի մասին՝ Սեյրան Սարոյանն ասաց, որ նրան շատ է հարգում: «Նիկոլի նման ընդդիմադիր չկա: Այսօր որ նա գնաց իշխանություն, բա ընդդիմադիր ո՞վ է լինելու»,-կատակեց պատգամավորը:

Աղբյուր` Փաստինֆո