Փաստ ինֆո

Մենք խոսում ենք սիրո ու համերաշխության հեղափոխության մասին, դրա էլեմենտը կա, մինչդեռ սոցցանցերում ատելության ու թշնամանքի սարսափելի վիճակ է տիրում: Այս մասին ՀՀ վարչապետի ընտրությունն անցկացնող ԱԺ հատուկ նիստում իր ելույթում արձանագրեց ՀՀԿ խմբակցության անդամ, վերլուծաբան Կարեն Բեքարյանը՝ հավելելով, որ հերթական անգամ սև ու սպիտակի ջրբաժան ենք գծել՝ Հանրապետականն այս աշխարհի ամենաչար ուժն է, գամված է իր աթոռներին:

ՀՀԿ-ական պատգամավորը դիմեց երիտասարդությանը, հարցնելով՝ ովքեր են միացել լավագույն նպատակներով շարժմանը, ովքե՞ր են խոսում ընտրակաշառքի, տարաբնույթ եղանակներով հարցեր լուծելու մասին: Ի՞նչ եղավ, մի ակնթարթում բոլորը մաքրվեցին, բոլորի հետ կապված ամեն ի՞նչ մոռացաք, ասաց նա:

«Մենք խոսում ենք սիրո ու համերաշխության մասին և դրա ներքո այսօր օգտագործում ենք ցունամին կգա՞: Դուք այս ժողովրդի երեխեքը չե՞ք, մեր երեխեքը չե՞ք: Այդ ցունամին ո՞ւմ վրա պետք է գա: Թշնամու վրա՞: Կամ այսօր արդեն խոսում են նրա մասին, որ եթե ինչ-որ բան չեղավ, արդեն հնարավոր է զենքեր, արդեն հնարավոր է ստիպված են լինելու դրան անդրադառնալ, նորմա՞լ է: Սրանք մեր սիրո ու համերաշխության շարժման, սիրո զարթոնքի գործիքնե՞րն են»,- ասաց Կարեն Բեքարյանը:

Որպես վերլուծաբան ԱԺ պատգամավորը փաստեց, որ Ռուսաստանի ու Արևմուտքի միջև շատ խոր դիմակայության շրջան է, երբ որ յուրաքանչյուր փոքր երկրի մի մազ այս կողմ, մի մազ այն կողմ առաջացնում է իրենց գոյության վտանգ: Վերջին տարիներին, ով գոհ է, ով՝ դժգոհ, բայց այդ բալանսը պահվել է:

Ըստ Կ.Բեքարյանի, ունենք թեկնածու, ով հայտարարել է ԵԱՏՄ, ՀԱՊԿ ինձ համար չկա, կարող է դրանից հետո տեղի է ունենում հասունացում, և մարդն ասում է՝ այսպես չի կարելի, բայց դրանից հետո կորել է բալամսը: «Բայց եթե մենք աշխարհաքաղաքական բալանսում, ուժային կենտրոններում վստահություն ենք խախտել, պե՞տք է նկարագրել այդ ինչ կարող է բերել»,- ասաց նա:

Կարեն Բեքարյանը՝ դիմելով երիտասարդությանն, արձանագրեց, որ նրանց դժգոությունների ուղերձը տեղ հասել է, սակայն արժե՞, արդյոք, ինչ-որ տարաբնույթ պաստառների ներքո, օրինակ՝ «Պայքար, պայքար մինչև վերջ», երկիրը տանել հասցնել մի այլ երկրի:

«Այսօր Հանրապետականը, երբ որ հարցը հասնի քվեարկության, կանգնելու է ջրբաժանի առաջ՝ ներքին ճգնաժամի պրոբլեմ, արտաքինի առաջացման պրոբլեմ, չի կանգնելու ջրբաժանի առաջ՝ աթոռը տակս է, թե տակս չէ»,- ասաց Կարեն Բեքարյանն՝ ընդգծելով, որ լուծում կա: «Կարող է պետք է գնալ ճանապարհով, օրինակ, մեր գործընկեր Փաշինյանը ինքնաբացարկ հայտարարի, ոչ մի քվեարկություն չունենանք արդյունքում, մի շաբաթվա մեջ աշխարհին միասնական ուղերձ տանք և մեզ այդ մամլիչի մեջ բերելու վտանգ չստեղծենք»: Հակառակ պարագայում չկա լավ ընտրություն, կա ընտրություն վատի ու ավելի վատի միջև, հավելեց Կարեն Բեքարյանը:

Աղբյուր` Փաստինֆո