Փաստ ինֆո

Ազգային ժողովի ՀՀԿ խմբակցությունը վարչապետի ընտրության նիստին որևէ խոչընդոտ չի հանդիսանա, քվորում կապահովվի: Այս մասին ԱԺ-ում լրագրողների հետ զրույցում նշեց խմբակցության ղեկավար Վահրամ Բաղդասարյանը: «Նիստը չի տապալվելու: Հայաստանի Հանրապետությունը կունենա վարչապետ, մենք չենք խոչընդոտելու, որ նիստը կայանա, քվորում կապահովվի: Հայաստանը վարչապետ կունենա սահմանադրական ժամկետում, քանի որ երկիրը չի կարելի պարալիզված պահել»,-ասաց խմբակցության ղեկավարը:

ՀՀԿ խմբակցությունը դեռևս չի հստակեցնում, թե ինչպես կքվեարկի, սակայն Վահրամ Բաղդասարյանը նկատում է, որ ճիշտ չի թողնել ազատ քվեարկության, այդ դեպքում, ըստ նրա՝ «կուսակցությունը կարող է իր դեմքը կորցնել»: «Եթե այսօր չի լինում, յոթօրյա ժամկետում պետք է ունենանք վարչապետի նոր ընտրություններ, հակառակ դեպքում Սահմանադրությունը պահանջում է լուծարել Ազգային ժողովը, իսկ դա մեր երկիրը բավական հետ կգցի»,- նշեց Բաղդասարյանը: Նրա կարծիքով՝ արտահերթ ընտրությունները չեն կարող դրական ազդեցություն ունենալ երկրի զարգացման վրա: «Եթե արտահերթ ընտրություններն անհրաժեշտություն լինեին, կլինեին դժգոհություններ 2017 թվականին, երբ ձևավորվեց խորհրդարանը, սակայն բոլորը երջանիկ էին այդ ընտրություններից հետո»,-«Արմենպրես»-ի հաղորդմամբ՝ նկատեց նա:  

Ինչ վերաբերում է հարցին՝ յոթ օր անց նոր ընտրության կազմակերպման դեպքում ՀՀԿ-ն կունենա թեկնածու, Բաղդասարյանը նշեց. «Մենք հայտարարել ենք, որ սեփական թեկնածուով հանդես չենք գա, չենք առաջադրել, իսկ հետագայի համար այդ հարցը չենք քննարկել, նման մտադրություն և որոշում չունենք, բայց ամեն ինչ կախված է քաղաքական զարգացումներից»:

Լրագրողների հարցին՝ արդյոք ապրիլի 30-ի կուսակցության գործադիր մարմնի նիստին մասնակցել է ՀՀԿ նախագահ, ՀՀ երրորդ նախագահ Սերժ Սարգսյանը, Բաղդասարյանը նշեց, որ նա որպես կուսակցության ղեկավար վարել է նիստը, սակայն չի միջամտում քաղաքական գործընթացներին:

Վահրամ Բաղդասարյանը բացառեց, որ ինքը ճնշման տակ կարող է որևէ գործողություն կատարել: «Մեր սերունդը մեծանում է այս երկրում, մենք պետք է մտածենք հետագայի մասին՝ վեց ամիս, մեկ տարի հետո մեր երկիրը, մեր պետականությունը ինչ առաջընթաց կունենա և ընդհանրապես կունենա, թե ոչ»,-ասաց Բաղդասարյանը:  

Նա նախորդ զարգացումները, այդ թվում՝ Սերժ Սարգսյանի՝ վարչապետի պաշտոնից հրաժարականը համարում է խոհեմության ու իմաստության արդյունք. «Երբ ապրիլի 24-ից առաջ ժողովրդի մի մասը ակցիաներ է իրականացնում և այդտեղ երկու տարբերակ կա՝ կամ պետք է գնալ բախումների, կամ պոտք է ինչ-որ քայլ կատարել: Անձը ինքը հրաժարվեց: Բայց երկրի ապագան չի կարելի կապել ցույցների, միտինգների և ճնշման հետ: Երբ խոսում ես երկրի ճակատագրի մասին, արդեն պետք է մտածել գաղափարական»:

Ազգային ժողովում վարչապետի ընտրության հատուկ նիստը կգումարվի մայիսի 1-ին: Առաջադրված միակ թեկնածուն Նիկոլ Փաշինյանն է: Երեք խմբակցություններ՝ «Ծառուկյան», ՀՅԴ, «Ելք» հայտարարել են նրա թեկնածությունը սատարելու մասին: Սակայն այդ խմբակցությունները միասին ունեն 47 ձայն. ընտրվելու համար անհրաժեշտ է նվազագույնը 53 ձայն:   

Աղբյուր` Փաստինֆո