Փաստ ինֆո

Ես չեմ կարող հիմա կոնկրետ անձանց կոնկրետ խնդիրներ քննարկել:

Նման հայտարարությամբ այսօր հանդես է եկել խորհրդարանական «Ելք» խմբակցության կողմից ՀՀ վարչապետի թեկնածու առաջադրված Նիկոլ Փաշինյանը՝ պատասխանելով նախկին ներքին գործերի նախարար Վանո Սիրադեղյանի հնարավոր վերադարձը երաշխավորելու մասին լրագրողի հարցին:

«Ես կարող եմ երաշխավորել վարչապետ ընտրվելու դեպքում Հայաստանի Հանրապետությունում ամբողջական օրինականություն կհաստատվի»,- ասաց նա:

Նիկոլ Փաշինյանը հայտարարեց նաև, որ ինքը չի պատրաստվում ՀՀ վարչապետի կարգավիճակում լինել և՛ վարչապետ, և՛ դատախազ, և՛ դատավոր, և՛ քննիչ։ «Ես կարծում եմ, որ իշխանության դերը իշխանության մարմինների, թևերի բնականոն գործունեության ապահովումն է, այսինքն՝ դրա քաղաքական պատասխանատվությունն ընկնում է կառավարության վրա։ Մնացած գործառույթները այդ մարմինները պետք է իրականացնեն։ Ես կարող եմ երաշխավորել, որ իշխանության տարանջատման սկզբունքը կպահպանվի։ Ես չեմ պատրաստվում ՀՀ վարչապետի կարգավիճակում լինել և՛ վարչապետ, և՛ դատախազ, և՛ դատավոր, և՛ քննիչ։ Հակառակ դեպքում մենք կընկնենք մի դաշտ, երբ մի կետից որոշվում է՝ ով է մեղավոր, ով՝ անմեղ», - արձագանքեց Փաշինյանը։

Հիշեցնենք, որ ՀՀ նախկին ներքին գործերի նախարար Վանո Սիրադեղյանը մի շարք սպանությունների աղմկահարույց քրեական գործով որպես մեղադրյալ էր ներգրավվել 1999 թվականի փետրվարի 19-ին։ Նա ձերբակալվել, ապա ազատ էր արձակվել անձնական երաշխավորությամբ մինչև 2000թ. ապրիլ ամիսը, երբ խորհրադարանի կողմից Վանո Սիրադեղյանին պատգամավորական անձեռնմխելիությունից զրկելու դատախազության միջնորդությունը բավարարվեց։ Նույն օրը հայտնի դարձավ, որ հետո Վանո Սիրադեղյանը փախուստի է դիմել և առայսօր գտնվում է հետախուզման մեջ:

Լուսանկարում՝ Վանո Սիրադեղյանը

Աղբյուր` Փաստինֆո