Փաստ ինֆո

Ազգային ժողովում այս պահին շարունակվում է ՀՀԿ խմբակցության պատգամավորների ու վարչապետի թեկնածու Նիկոլ Փաշինյանի հանդիպումը։

«Հայաստանը ԵԱՏՄ անդամ է, ու մենք, լինելով քաղաքական գործիչներ, պետք է հաշվի նստենք իրողությունների ու փաստի հետ, ցանկացած գործիչ, ով ելնում է ՀՀ ազգային շահերից, պետք է այդպես անի», - ասաց Նիկոլ Փաշինյանը՝ պատասխանելով Էդուարդ Շարմազանովի հարցին։

Անդրադառնալով իր նախկին հայտարարություններին, այն է՝ դուրս գալ ԵԱՏՄ-ից, Նիկոլ Փաշինյանն ասաց.

«Երբ դու ընդդիմության ներկայացուցիչ ես, դու հնարավորություն չունես այն խնդիրները, որ կան, ուղիղ քննարկել գործընկերների հետ, երբ իշխանության ներկայացուցիչ ես, կա հնարավորություն այդ հարցերը քննարկել համբերատար, փոխադարձ հարգանքի մթնոլորտում, մենք այդպես էլ կվարվենք»։

Նիկոլ Փաշինյանն ընդգծեց՝ այո՛, էլի ասում է, որ ՀՀ-ում, իր վարչապետ ընտրվելու պարագայում, ԵԱՏՄ-ին անդամակցությունը դադարեցնելու հարց չի բարձրացվելու։

«Սա չի նշանակում, որ ես ասում եմ ԵԱՏՄ-ում ամեն ինչ իդեալական է, կան խնդիրներ, մենք կաշխատենք բոլոր այդ հարցերը քննարկել ու հասնել լուծումների», - ասաց նա։
Ի պատասխան՝ Էդուարդ Շարմազանովն ասաց, որ Նիկոլ Փաշինյանի պատասխաններն իր համար համոզիչ չէին։

«Ազնիվ եմ խոսում ու անկեղծ, չհամոզեցիք ու ասեմ ինչու՝ ես այն կարծիքին չեմ, որ ընդդիմության ներկայացուցչի խոսքը պետք է պակաս պատասխանատու լինի, քան իշխանության, և ես այն կարծիքին չեմ, որ եթե ընդդիմություն ես ու գալիս ես իշխանության, պետք է առաջնորդվես միայն իշխանության առաջնորդի պետական շահերով, իմ կարծիքով՝ քաղաքական գործչի համար արտաքին ու ներքին քաղաքական ծրագրային պլատֆորմը պետք է լինի հստակ ու դա չպետք է կախված լինի Էդուարդ Շարմազանովը էսօր իշխանություն է՝ ասում է ՀԱՊԿ-ն այլընտրանք չունի, վաղը դառնամ ընդդիմություն՝ ասեմ ՀԱՊԿ-ից գնանք Եվրամիություն։ Դուք էսօր շատ լավ ապացուցեցիք, որ ՀՀ իշխանության արտաքին քաղաքականությունը բխում է ՀՀ պետական շահերից, որի համար ձեզ շատ շնորհակալ եմ», - նշեց ԱԺ փոխնախագահը։

Նիկոլ Փաշինյանն էլ ասաց, որ չի ուզում բանավեճի մեջ մտնել Շարմազանովի հետ։

«Ես չեմ ուզում բանավեճի մեջ մտնել, ուղղակի պետական ու քաղաքական գործիչները պետք է հաշվի նստեն փաստերի հետ», - նշեց նա։

Արձագանքելով՝ ԵԱՏՄ-ից Հայաստանի դուրս չգալու վերաբերյալ Փաշինյանի արած հայտարարությանը, Արմեն Աշոտյանը հայտարարեց.

«Ես կարծում եմ, որ երբ Հայաստանի ընտրված վարչապետ Սերժ Սարգսյանը հրաժարական էր տալիս և ասաց՝ Նիկոլը ճիշտ էր, ես սխալվեցի, այս բոլոր հարցերի պատասխանը կարելի էր փակել, ասելով, որ այս դեպքում Սերժը ճիշտ էր, Նիկոլը սխալվեց»։

Աղբյուր` Փաստինֆո