Փաստ ինֆո

Պահպանողական կուսակցությունը հայտարարություն է տարածել՝ ՀՀ-ում ստեղծված ներքաղաքական վիճակի մասին, որում նշվում է.

Քաղաքական համակարգի փտածության հետեւանքով պետությունը գտնվում է քաղաքական խորը ճգնաժամի մեջ,

Նիկոլ Փաշինյանի ղեկավարած քաղաքացիական հուժկու շարժումը բարեպատեհ հնարավորություն է ստեղծել որակապես նոր, արժանապատիվ, իրապես անկախ, ստեղծարար, առաջադեմ մոդելի պետություն կառուցելու համար,

Ներկա Խորհրդարանը չի արտացոլում հանրային տրամադրությունների եւ քաղաքական կողմնորոշումների իրական պատկերը,

Պահպանողական կուսակցությունը հայտարարում է, որ ստեղծված ճգնաժամից ամենաշահավետ ելքը ՀՀ բազմահազար քաղաքացիների առաջադրած ներկայացուցչին ԱԺ-ում վարչապետ առաջադրելն ու հաստատելն է, ինչպես նաեւ բացառապես ժողովրդի ներկայացուցիչ վարչապետի առկայությամբ արտահերթ խորհրդարանական ազատ, արդար եւ թափանցիկ ընտրությունների անցկացումը:

Այսու՝ Պահպանողական կուսակցությունը, ողջունելով եւ քաջալերելով ՀՀ Նախագահի քաղաքակիրթ պետականավարման երաշխավորի արդյունավետ մոտեցումներն ու գործունեությունը, Խորհրդարանում ներկայացված ուժերին հորդորում է հանձնվել քաղաքացիական շարժման վերոնշյալ պահանջներին, քանի որ միայն այդ հանձնվելն է, որ հաղթանակ է հանրային բոլոր շերտերի, Հայոց պետականության համար:

Հատկապես իրենց պահպանողական համարող, լուսահոգի Աշոտ Նավասարդյանի Հանրապետական կուսակցության սկզբունքներին չդավաճանածներն այս եզրագծային պահին պարտավորություն ունեն վարչապետի պաշտոնում առաջադրելու ժողովրդի ընտրյալին եւ քվեարկելու նրա օգտին:

Աղբյուր` Փաստինֆո