Փաստ ինֆո

Բուհերի ղեկավար կազմում չպետք է լինեն կուսակցական անձինք։ Այսօր ԵՊՀ-ի բակում տեղի ունեցած հավաքի ժամանակ հայտարարեց Ուսանողական շարժման անդամ Դավիթ Պետրոսյանը՝ նշելով, որ ուսանողներով հավաքվել և քննարկել են խնդիրները:

«Մեզ մոտ արդեն արմատավորվել է,  և մենք զգում ենք, որ հաղթանակը շատ մոտ է, բայց մի քանի կարևոր հարցեր կան, որ ուսանողներով պետք  է շեշտենք: Առաջինը բուհերի ապակուսակցականությունն է»,- ասաց նա:

Դավիթ Պետրոսյանն ասաց, որ հեղափոխությունից հետո բուհերի ղեկավար կազմում չպետք է լինեն կուսակցական անձիք, քանի որ նրանց ներկայությունը բացասական ազդեցություն է ունենում ԲՈՒՀ-ի ընդհանուր ինքնակառավարման, ինչպես նաև կրթության որակի վրա: «Հեղափոխությունից հետո Բուհերի ղեկավար կազմում, գիտխորհրդում, ուսանողական խորհուրդներում չպետք է լինեն կուսակցական անձինք և սա չի վերաբերում միայն Հանարպետական կուսակցությանը, դա վերաբերում է  բոլոր քաղաքական ուժերին»,- հայտարարեց նա:

 Համալսարանի ուսանողները կարևորում են, որ համալսարաններում ազատ խոսքը, ազատ միտքը չհետապնդվի, կուրսի ավագները  ոչ թե  զբաղվեն դեկանատների հրամանները իրականացնելով, թե ով ինչ է խոսում կուրսում, այլ պետք է իրենց պարտականություններով զբաղեն:

Ուսանողները հայտարարեցին, որ համալսարանում պետք է լինի նորմալ կրթական ակադեմիական մթնոլորտ, այլ ոչ թե ինչ որ մի խումբ մարդկանց շահերը սպասարկող կառույց:

Թատերական ինստիտուտի ներկայացուցիչն էլ  հայտարարեց, որ երեկ իրենց ԲՈւՀ-ի ուսանողական խորհուրդը դիմում է ներկայացրել Հանրապետական կուսակցությունից դուրս գալու մասին:

Ուսանողները պատրաստվում են ԵՊՀ-ից երթը շարունակել դեպի Բժշկական համալսարան, ապա Ագրարային,  Պոլիտեխնիկ, հետո Թատերական ինստիտուտ և վերջում Հանրապետության հրապարակ:

Աղբյուր` Փաստինֆո