Փաստ ինֆո

Ընդդեմ Սերժ Սարգսյանի վարչապետության շարժման այսօրվա հանրահավաքի ավարտից հետո մինչև վաղվա ժամը 17.00-ն քաղաքացիական անհնազանդության ոչ մի գործողություն չի իրականացվելու: Այս մասին հանրահավաքում հայտարարեց շարժման ղեկավար, ԱԺ պատգամավոր Նիկոլ Փաշինյանը:

Շարժման ղեկավարը հայտնեց, որ դադար են վերցնում, որպեսզի իրենք՝ իրենց թիմով, հնարավորություն ունենան քաղաքական կոնկրետ աշխատանքը ավարտին հասցնել՝ դե ֆակտո հաղթանակը դե յուրե հաղթանակի արձանագրումը երաշխավորելու համար: «Վաղը առավոտից շատ կարևոր աշխատանք ունեմ անելու Ազգային ժողովում: Ես պետք է հանդիպում ունենամ խորհրդարանական բոլոր խմբակցությունների ներկայացուցիչների հետ, որպեսզի այդ քննարկումների արդյունքում օրվա վերջում ձեզ կարողանամ տեղեկատվություն տալ, որ ձեր առաջարկած թեկնածուի ընտրությունը մայիսի մեկին վարչապետի պաշտոնում երաշխավորված է»,- ասաց նա:

Ն.Փաշինյանը կոչ արեց նաև դադարեցնել բոլոր հանրապետական պատգամավորների հեռախոսահամարներին հաղորդագրությունների, զանգերի, նամակների միջոցով կոնտակտի դուրս գալը ու նրանց առաջ պահանջներ դնելը: «Նախնական պայմանավորվածության համաձայն, ես վաղը ձեր անունից հանդիպելու եմ նրանց՝ որպես վարչապետի թեկնածու, որպեսզի մենք մեր օրակարգն ամբողջական քննարկենք և իրականություն դարձնենք»,- ասաց Նիկոլ Փաշինյանը:

Իսկ վաղը ժամը 17.00-ին Երևանի Գարեգին Նժդեհի հրապարակից երթով շարժման մասնակիցները կուղղվեն Հանրապետության հրապարակ, որտեղ շարժման ղեկավարը կհայտնի այդ օրվա ընթացքում ԱԺ խմբակցությունների պատգամավորների հետ բանակցությունների արդյունքների մասին, հանրահավաքում էլ որոշում կկայացվի հետագա անելիքների մասին՝ կախված իրավիճակից:

Ն.Փաշինյանը հայտնեց նաև, որ դրա հաջորդ օրը՝ մայիսի մեկին, բոլորը առավոտյան ժամը ութից Երևանից ու մարզերից կհավաքվեն Երևանի Հանրապետության հրապարակում: Թե այդ օրն ինչպես և որտեղ կանցկացնեն շարժման մասնակիցները, կախված կլինի այդ առավոտվա դրությամբ ստեղծված քաղաքական իրավիճակից:

Նիկոլ Փաշինյանը հայտարարեց, որ ցանկանում է շատ հստակ պատասխանել «ՀՀ օդում կախված մի հարցի »՝ այո, ինքը պատրաստ է պատասխանատու ձևով ստանձնել ՀՀ վարչապետի պաշտոնը, որովհետև ծառայում է հայ ժողովրդին, Հայաստանին ու Լեռնային Ղարաբաղին:

Աղբյուր` Փաստինֆո