Փաստ ինֆո

Խոսքի ազատության, ազատ մամուլի, հանդուրժողականության, ժողովրդավարության, օրենքի առաջ հավասարության մասին կոչեր հնչեցնողներն այս օրերին սևերի և սպիտակների են բաժանվել, եթե մեր հետ չես՝ ուրեմն մեր դեմ ես: Իհարկե սա նոր երևույթ չէ հայկական իրականության համար, որը պարբերաբար սուր դրսևորումներ է ստանում քաղաքական ակտիվ գործընթացների ժամանակ։

Այս օրերին ևս ի ցույց դրվեց խոսքի ազատության, այլախոհության, բազմակարծության նկատմամբ անհանդուրժողականությունը հատկապես սոցցանցերում։

Բավական է մեկ կարծիք կամ նկատառում, որտեղ ԱԺ պատգամավոր Նիկոլ Փաշինյանի նախաձեռնած ակցիայի վերաբերյալ հնչեցվում են վերապահումներ պարունակող գնահատականներ կամ ներկայացվում նրա կենսագրական տվյալները, դառնում ես ատելության գրոհի թիրախ։

Անգամ առանձին հասարակական, քաղաքական գործիչներ, որպես իրավապաշտպան հանդես եկող անձինք են անհանդուրժողականության սվիններով դիմավորում իրենց կարծիքին չհամընկնող ցանկացած խոսք. բազմակարծությունն ընդունելի է միայն Նիկոլ Փաշինյանի նախաձեռնողությունը սատարելու ընդհանուր գաղափարախոսության ներքո։

Բազմակարծության նկատմամբ այս անհանդուրժողականությունը ոչ այլ ինչ է, եթե ոչ արջի ծառայություն ընդդիմադիր գործչին։ Նրա շարժման հաջողության գրավականը հենց գործողությունների ընթացքում բռնության բացառումն էր, խաղաղ ակցիաների կազմակերպումը, մինչդեռ տեղեկատվական այս ատելության դրսևորումներով ուղեկցումը ստվերում է դրանք։

Խնդրին բազմիցս անդրադարձել է մարդու իրավունքների պաշտպանը՝ մտահոգիչ համարելով սոցիալական ցանցերում ատելության դրսևորումներն ու ծավալը։ Նախօերին նաև ԵԼՔ խմբակցության ղեկավար Նիկոլ Փաշինյանը մամուլի ասուլիսում անընդունելի համարեց բազմակարծության դեմ նկատվող այս անհանդուրժողականությունը։

«Ահանդուրժողականության որևէ դրսևորում պետք չէ, որ լինի։ Կարծում եմ, որ մեր պատկերացումը Հայաստանի մասին այնպիսին է, որ յուրաքանչյուրը պետք է իր կարծիքը ազատորեն արտահայտելու, տարածելու, տեղեկատվություն փնտրելու հնարավորություն ունենա։ Կարծում եմ, որ մեր շարժման ներկայացուցիչները հատկապես պետք է էմոցիոնալ պոռթկումներ չունենան, որովհետև մեր շարժումը կշռադատված և հանդուրժողականության ու սիրո շարժում է»,- հայտարարել է Նիկոլ Փաշինյանը։

Թերևս սա հանրային ազդակ է ուղղված իր այն կողմնակիցներին, ովքեր արդեն ԶԼՄ-ների սև ցուցակ են կազմել, որոնք պետք է արգելափակեն։ Ասել է թե կողմնակիցների մի զանգված՝ ցանկանում է կարդալ ու լսել միայն այն, ինչը համընկնում է իր կարծիքի հետ։

Նիկոլ Փաշինյանը, լինելով մասնագիտությամբ լրագրող և ունենալով երկարամյա փորձ, թերևս շատ լավ է գիտակցում ազատ խոսքի, քննադատության ուժը, որը լուրջ խթան է զարգացման համար, իսկ նրա շրջապատում, ցավոք, այսօր նկատվում են մարդիկ, ովքեր փորձում են արգելափակել քննադատությունը՝ սահմանելով յուրօրինակ գրաքննություն։

Ուզում ենք հուսալ, որ ինքը՝ Նիկոլ Փաշինյանը, որպես պրոֆեսիոնալ լրագրող, երբեք չի ընկնի այդ սահմանափակումների թակարդը ու կդրդի իր կողմնակիցներին լինել ավելի լայնախոհ։

Աղբյուր` Փաստինֆո