Փաստ ինֆո

Պարզ է, որ մենք Ռուսաստանի, առավել ևս մեր երկրի թշնամին չենք, որպեսզի մեր երկիրը տանենք ոչ խելամիտ ու արկածախնդիր ճանապարհներով: Այս մասին Գյումրիում անցկացված հանրահավաքում հայտարարել է ընդդեմ Սերժ Սարգսյանի վարչապետության շարժման ղեկավար, ԱԺ պատգամավոր Նիկոլ Փաշինյանը:

Շարժման ղեկավարը հավաստիացրեց, որ իրենց իշխանության գալուց հետո աշխարհաքաղաքական ռեվերսներ չեն լինելու: «Մենք երբեք չենք ասել ու չենք ասում, որ Հայաստանը պետք է դուրս գա Հավաքական անվտանգության պայմանագրի կազմակերպությունից, մենք երաշխավորում ենք, որ Հայաստանը կմնա ՀԱՊԿ-ի անդամ ոչ թե նրա համար, որ շատ կամ քիչ ենք սիրում այդ կազմակերպությունը, այլ որովհետև դա բխում է ՀՀ ազգային շահերից: Բայց մենք նաև կաշխատենք, որպեսզի այդ կազմակերպությունը արդյունավետ լինի և շատ ավելի լուրջ երաշխիքներ ապահովի ՀՀ-ի և ԼՂՀ-ի համար, քան ապահովում է մինչև հիմա: Մենք այս հարցերը չենք պատկերացնում որպես հարցեր, որ պետք է լուծվեն հակամարտության տոնայնությամբ, սա համբերատար, խաղաղ, գործընկերային աշխատանքի հարց է»,- ասաց Նիկոլ Փաշինյանը:

Շարժման ղեկավարը նաև հաստատեց, որ Հայաստանը հավատարիմ կմնա իր բոլոր միջազգային պարտավորություններին, ներառյալ՝ Եվրամիության հետ կնքած Խորը և համապարփակ համագործակցության պայմանագրին, ինչպես նաև Եվրասիական տնտեսական միության պայմանագրին:

«Սա չի նշանակում, որ մենք համարում ենք, որ երկու ուղղությամբ համագործակցությունը Հայաստանի ու ԵԱՏՄ-ի կամ Եվրամիության հետ անթերի է, ամենևին ոչ: Մենք, այո, պետք է ձգտենք այդ հարաբերությունները դարձնել անթերի: Հզոր ժողովրդի աջակցությամբ մենք դա անպայման ու անխուսափելիորեն կանենք»,- ասաց Նիկոլ Փաշինյանը:

Աղբյուր` Փաստինֆո