Փաստ ինֆո

Ապրիլի 13-ից մինչև ապրիլի 26-ը մայրաքաղաքում տեղի ունեցած ցույցերի ժամանակ հազարավոր քաղաքացիների կողմից, ինչպես նաև ավտոմեքենաներով ճանապարհների փակ լինելու պայմաններում խոչընդոտվել է Շտապօգնության աշխատանքը:

«Փաստինֆո»-ի թղթակցի հետ զրույցում «Շտապ օգնություն» ՓԲԸ ղեկավար Թագուհի Ստեփանյանը նշեց, որ մինչև 1 ժամ ուշացումներ են գրանցվել և շտապօգնության բրիգադը դժվարությամբ է հասել կանչի վայր, ինչը որոշակի խնդիրներ է առաջացրել:

Քաղաքացիների կողմից ճանապարհները փակելու պարագայում բանակցելու արդյունքում ճանապարհները թեև դժվարությամբ, սակայն բացվել են, իսկ ավտոմեքենաներով ճանապարհները փակելու պարագայում՝ անհնար է եղել շտապ օգնության ավտոմեքենայի արագ կանչի վայր հասնելը:

Թագուհի Ստեփանյանը այդ դեպքերից մի քանիսը մատնանշեց՝ Վաղարշյան և Արամ Խաչատրյան փողոցների խաչմերուկը, ինչպես նաև Նալբանդյան և Թումանյան խաչմերուկի փակ լինելը բավականին խնդիրներ է ստեղծել: Նալբանդյան և Թումանյան խաչմերուկում նույնիսկ մի երիտասարդ կանչի վայր շտապող շտապ օգնությանը «խորհուրդ» է տվել շրջանցել, ուրիշ ճանապարհով գնալ:

Ուստիև նման պայմաններում շտապ օգնության ավտոմեքենաները ստիպված են եղել շրջանցել, այլ ճանապարհ գտնել՝ ինչը ևս անխոչընդոտ չի եղել:

Ըստ «Շտապ օգնություն» ՓԲԸ ղեկավարի՝ այս օրերին շտապ օգնությունն արտակարգ ռեժիմով է աշխատել, միայն 6 ավտոմեքենա հերթապահել է որպեսզի հանրահավաքի ժամերին հատկապես անհրաժեշտության պարագայում հրապարակում անմիջապես բուժօգնություն ցուցաբերի քաղաքացիներին:

Հանրահավաքի ժամերին հատկապես խոչընդոտվել է կանչի վայր շտապող շտապ օգնության աշխատանքը:

Աղբյուր` Փաստինֆո